Ким Васин лӱмеш Шернур районысо библиотеке пелен Шернур посёлкысо тунемше-влакын волонтёр тӱшкашт уло. Тудым июль тылзыште чумыреныт. Лач тиде жапыште библиотекарь-влак шке проектыштым Марий Эл Республикым вуйлатыше Александр Евстифеевын шке кумылын волонтер-влаклан полышым пуымаште увертарыме конкурсыш колтеныт.

Юрино поселкышто стадионым чоҥаш тӱҥалыт. Тудым «Демографий» нацпроектын «Спорт-норма жизни» федерал проект дене ыштат. Самырык-влакын политике, спорт да туризм министерстве стадионым чоҥышаш компаний дене ойпидышым пеҥгыдемден. У объект Дворцовый аллей бульварыште лиеш. Тушто футбол да волейбол пасу, баскетбол площадке, кӱкшыТышкӧ тӧрштылаш площадкым ыштат. Стадионым 20 декабрь марте ыштен шуктышаш улыт. 

Республикыште уржа-сорла тургым. Тачысе кечын озанлык-влак 93 тӱжем гектарыште пырчым поген налыныт. Тиде – удымӧ кумдык гыч 69 % лиеш. Ялозанлык пашаеҥ-влак чылаже 252 тӱжем тонн пырчым шийыныт. Тений лектыш ик гектар гыч 27 центнерышке шуэш. Кодшо ийын ик гектар гыч шагалрак, 23 центнерым погеныт ыле. Тиде кечылаште Марий Турек, Медведево, Оршанка район-влак пашам чолган шуктат. Тушто кокла шот дене 40 тӱжем тонн наре пырчым погеныт. Лектышым аклаш гын,  Медведево район эн ончылно улеш. Тушто ик гектар гыч 36 центнерым шийыныт.

Медведево районышто «Семицветик» лӱман у йочасад почылтын. Тушко 320 йоча кошташ тӱҥалеш. Нуным 13 группышко чумырат. У йочасадым пайремлын почмаште регион вуйлатыше А.Евстифеев лийын. Республике правительстве у объект-влак ыштымым тӱткышыштӧ куча. Тидлан «Демографий» нацпроект полшын ышта. Кодшо ийын гына 6 йочасадым почыныт, тушто 1165 вер ышталтын. Тений республикыште 1010 верым ыштат. Медведево районыштак, Чехов уремыште, 100 верлан йочасадым ышташ тӱҥалыныт, нылымше кварталыште Руэм поселкышто ышташ тӱҥалыт. Тыгак Медведево поселкышто 825 верлан школым ыштат. Александр Евстифеев йочасадын заведующийже Светлана Данилова дене пырля охранын пӧлемыштыже лийын.

Крымыште марий пайрем. Севастополь олаште «Угиндым» палемденыт. Марий кундем гыч тушко делегаций каен. Тиде «Россий марий-влак» калыкле тӱвыра автономийын председательже Лариса Яковелева, марий тӱвыра рӱдерын вуйлатышыже Наталья Пушкина, мурызо Светлана Яндукова да молат каеныт. 

Шернур рӱдӧ эмлымверышке «Земский доктор» программе дене участковый терапевт пашашке толын. Тудо 1 сентябрь гыч Казанский врачебный амбулаторийыште пашам ышта. Йошкар-Олаште шочшо еҥ медициныште 30 ий пашам ышта, ты марте вашкеполыш станцийыште фельдшерлан пашам ыштен, тений Марий кугыжаныш университетыште «Лечебное дело» специальность дене тунемын пытарен.

Марий Элыште коронавируслан кӧра ӱмыр лугыч лийше-влакын чотышт 43 шуын. 8 сентябрьлан республикыште кок пациент колен. Оперативный штабын уверже дене, пандемий тӱҥалме дечын вара республикыште тиде вирусым 4392 еҥын пеҥгыдемденыт, пытартыш суткаште 17.  Лабораторно пеҥгыдемдалтше инфекций гыч 70% кум муниципал районышто: Йошкар-Ола, Медведево да Волжский районлаште регистрироватленыт. 

Республикысе рӱдӧ юмынйӱла ушемын у вуйлатышыже. Шуматкечын онаеҥ-влакын черетан погынымашышт лийын. Тушто оргнизацийын у вуйлатышыжым сайленыт, тыгак уставышке ешартышым да вашталтышым пуртеныт.  Тыге онаеҥ-влак шке  ушемыштым ик   ой дене Александр Бирюковлан вуйлаташ ӱшаненыт. 

Марий Эл «Профессиональный доходлан налог» посна налог режим шотышто экспериментыш ушнен. Тудо 6 сентябрьыште тӱҥалын.

Профессиональный доходлан налог – тиде ешартыш налог огыл, а самозанятый-влаклан у специальный налог режим. Тудын дене 10 ий  пайдаланаш лиеш. Тушко еҥ-влак шке кумылын куснен кертыт.

Ондалалтше дольщик-влакын йодышышт рашемммыштым регион вуйлатыше А.Евстифеев эреак терга. Регион вуйлатыше Йошкар-Олаште чоҥен шуктыдымо объект-влакым ончен. Тиде Красноармейский да Первомайский уремлаште пӧрт-влак. «Оршанский» микрорайонышто 84 пачеран пӧрт дене пай дене чоҥаш 31 ойпидышым ыштеныт. 10 августышто у чоҥышо дене келшымашым ыштеныт.