Кеҥежын пытартыш тылзыштыже республикыште 419 у еш шочын. Август тылзыште Марий Элысе ЗАГС пӧлка-влак йоча шочмаш дене кылдалтше 556 актым пеҥгыдемденыт. Ача-ава – влак шке ӱдыр-влаклан утларакшым Анна, Екатерина, София, Арина, Елизавета, Мария, Милана лӱмым пуэныт, эрге-влаклан – Илья, Андрей, Матвей, Егор, Тимофей, Максим, Артём лӱм-влакым.
Кодшо кечылаште 39 тӱжем утла дозо «Совигриппым» конденыт. Тидын нерген Марий Эл республикыште Роспотребнадзор виктем увертара. Вакциным йоча поликлиникылашке колтеныт. Йочасад да школышко коштшо ӱдыр-рвезе-влаклан иммунизацийым ыштат. Кугыеҥ-влаклан вакцинын партийже эше август мучаштак толын, кызыт тудым ышташ тӱҥалыныт. Тений республикыште 410 тӱжем утла еҥлан грипп дечын прививкым ыштышаш улыт.
Марий Эл Кугыжаныш Погын черетан 12-шо сессийышке чумырген. Депутат-влак икмыняр йодышым каҥашат, законпроект-влакым ончен лектын, пеҥгыдемдышаш улыт. Тидын коклаште республикысе бюджетышке пуртымо вашталтыш, сайлымаш закон-влаклашке ешартыш, тыгак аракам ужалымашым чарымаш дене кылдалтше закон проектым каҥашат. Тидын дене пырля моло проектымат пеҥгыдемдышаш улыт.
Тӱвыра, печать да калык-влакын пашашт шотышто министерстве «Марий Элын идалыкын книгаже» республикысе конкурсым увертарен. Тушко республике, мунициапал, книгам шке вий дене лукшо-влак ушнен кертыт. Конкурсышко 2019-2020 ийлаште, тыгак Марий Элын 2018 ийысе книга конкурсышто ончыкталдыме книга-влак пурен кертыт. Паша-влакым С.Чавайн лӱмеш книгагудышто 10 декабрь марте вучат. Конкурсым Марий тиште кечын 10 декабрьыште иктешлат. Тений тиде конкурс 9 гана эрта.
Республикысе курчак театрын артистше-влак Екатеринбург олаште «Йӱд орол» спектакльым ончыктат. Тиде кечылаште Урал кундемыште «Петрешка Великий» тунямбал кӱкшытан фестиваль эрта. Тушко элнан тӱрлӧ регионлаж гыч курчак театр-влак чумыргеныт. А тиде Ульяновск, Санкт-Петербруг, Ижевск, Киров гыч коллектив-влак. Марий эл республикысе курчак театр «Йӱд орол» спектакльым кок кече ончыкта. Ешарен кодена, тиде спектакль «Золотая маска» премийлан номинант, тыгак тудо «Йошкар-Ола театральная» фестивальыште гран-при дене палемдалтын.
Иван Ямбердовын ончерже 16 сентябрьыште Республикысе сӱретсымыктыш тоштерыште почылтеш. «Мӱкш Тӱня Мари» персональный выставке Российын сулло сӱретчыжылан 65 ияш лӱмгечыже вашеш эрта. Выставкышке Иван Михайловичын эн ойыртемалтше да палыме пашаже-влакым пуртат. Мастар еҥын кажне радынаштыже шочмо кундемым жаплыме, марий йӱлам пагалыме да аклыме шижмаш уло. Иван Ямбердов республикыште веле огыл, Российыштат палыме сӱретче.
Шернур район гыч озанлык пашаеҥ Российысе чап лӱмым сулен. Владимир Путинын указше дене Валерий Токтаровлан «Россий федераций ялозанлыкын сулло пашаеҥже» чап лӱмым пуэныт. Указ дене келшышын, кӱкшӧ наградым тракторист-машинистлан ятыр ий ялозанлыкыште пашам ыштымылан пуэныт. Валерий Токтаров Шернур районышто «Лукоз» озанлыкыште пашам ышта.
«Синяя птица» гуманитарный гимназийын у корпусшым ыштымеке, Сомбатхей микрорайонышто школышто верым ешара. А.Евстифеев тидлан ойырымо верыште лийын. «Синяя птица» гимназийым 1986 ийыште ыштеныт. Тышке ятырын тунемаш толаш кумылын улыт, тиде школым пытарыше-влак чылан гаяк кӱшыл тунемме верышке пурат. Но школышто вер шагал, актовый да спортивный зал уке.
Козьмодемьянск оласе аварийно-утарыше службын пашыжлан аэролодкым налыныт. Тудо утарыше-влаклан Юл да Вӱтла эҥерлаште лӱдыкшӧ вер-влакым патрулироватлаш полша. Тыгак ий шулымо годымат утарыше да водолаз-влакым аэролодко дене кӱлеш верышке намиен шукташ лиеш. Аэролодко ик шагатыште 100 меҥгым эртен кертеш, иканаште ик тонн дечынат утларак грузым налын сеҥа. Тиде 10 пассажир да ешартыш нелыт. Тӱҥжӧ тиде пуш дене вӱд денат, куп да ий денат каяш лиеш. Таче кечын Марий Элыште утарыше-влакын тыгай судно икте веле. Аэролодко дене пырля Коьмодемьянскысе утарыше-влаклан эше квадроциклым налыт.
13 сентябрьыште Марий Элыште южо кундемыште сайлымаш лиеш. Тиде кечын мунициапал образованийлаште южо округышто представительный органлаште сайлымаш лиеш. Республикыште тиде кечын 19 участке пашам ышташ тӱҥалеш. 11 да 12 сентябрьыште участкыште ончылгоч йӱклымӧ кече. Йӱклымаш Йошкар-Оласе икмыняр участкыште, Волжскышто, Марий Турек, Медвеедво, Морко, У Торъял районлаште южо илемлаште эрта. Тора яллашке сайлымаш комиссийыште пашам ыштыше-влак шкешт лектыт.
