Коронавирусан пациент-влакым эмлыше медпашаеҥ-влакын стажыштым у семын шотлат. Пашам ыштыме ик кече кок кечылан шотлалташ тӱҥалеш. Пенсий фондышто увертарат, медпашаеҥ коронавирус але тудын лийын кертме лӱдыкшӧ дене пациентым эмла гын, стажыште тиде вашталтыш лиеш. 
Марий Элыште коронавирус дене черланыше-влакын чотышт шукемеш. Пытартыш суткаште 22 еҥын лабораторно тиде вирусым пенгыдемденыт. Пандемий тӱҥалме дечын вара республикыште 4500 наре еҥ черланен, 46 еҥ ӱмыр лугыч лийын, эше икте пытартыш суткаште. Инфекционный стационарыште 368 еҥ эмлалтеш, утларакшын -пневмоний, 7 еҥ - шодын искусственный вентиляцийыште, 168 кислород полшымо дене шӱлат.
ОРВИ дене черланыше-влак шукемыт. Роспотребнадзор виктем палдара. Эртыше арняште республикыште 4 тӱжем утла еҥын пӱсӧ респираторный вирусан инфекцийым палемденыт, грипп республикыште уке. Чер дечын аралалташ вакцинаций полша. Тений республикыште 410 тӱжем утла еҥлан прививкым шындышаш улыт. Тиде республикыште илыше-влак дечын 60%. Лӱдыкшӧ тӱшкаште улшо-влаклан привикым утларак ышташыш улыт, медицин да образований учрежденийлаште тыршыше-влаклан гын 80-90% приивкым шындышаш улыт.
Идалыкын туныктышыжо-влакым ойырат. Республикыште «Идалыкын туныктышыжо 2020», «Идалыкын воспитательже», «Марий йылмым туныктышо» конкурслаште педагог-влак шке пашаштым ончыктат. Коронавирус инфекцийым шижтараш профессионал мастарлык конкурс-влак очно-заочно эртат. Очный этап кодшо ийын конкурсышто сеҥышын паша верыштыже эртышаш улыт.
Вес ийын ава капитал кугемеш. Икымше йочалан 483 тӱжемат 882 теҥге, кокымшылан 639 тӱжемат 432 теҥге лиеш. Тидын нерген ТАСС увер агентстве палдара. Таче кечын ава капиталын кугытшо 466 тӱжемат 617 тенге. Кызытсе жап дене таҥастараш гын, тудо 4% нарылан кугемеш. Шотлен лукмо почеш, вес ийын ава капиталым 1 миллион утла еш налын кертеш, тидлан российысе бюджетыште 400 утла млрд теҥгем палемдат.
Самырык еш-влак пӧртсийым палемдат. Тений Марий Элыште 9 тылзыште 39 самырык еш шке илымверан лийын. Тидлан «Жилище» федерал программын «Самырык-влаклан илымверым ситарыме» подпрограмме полшен. Ты программе 2015-2020 ийлан пенгыдемдалтын. Тений республикыште социальный выплатым 54 самырык еш налшаш. Тиде программышке республикын 13 муниципал образований ушнен. Эн шуко участник - Морко районышто, 14 лийын.
Самырык амалкалче-влак экономикым вияҥдат. Марий Элыште «Российын самырык предпринимательже» конкурсын регионысо этапше эртен. Конкурсышко тений 20 йодмаш пурен. Нунын гыч куд еҥым сеҥышылан шотленыт. Ынде нуно Уфаште эртыше конкурсышто финалыште шке пашаштым ончыктат. Тений амалкалче-влакым икмыняр номинацийыште акленыт.
Российыште да Марий Элыштат йӱклымаш кече эртен. Марий Элыште шым округ дене муниципал кӱкшытан сайлымаш лийын. Тыге мутлан, Йошкар-Олаште утларак йӱкым Вера Вертинская да Илья Кулалаев погеныт. Волжскышто Елена Баранова верч утларак еҥ йӱклен. Марий Турек районышто ик тӱжем утла еҥ йӱклымашке ушнен, да тушто Мария Погудина сеҥен. Медведево районышто Юрий Ходырев, Морко районышто Алексей Катченко, У Торъялыште Аркадий Семенов моло дечын утларак йӱкым поген. Ончылгоч йӱклымо кечылаште да сайлымаш кечын избирательный комиссийыште 70 пашаеҥ да 72 эскерыше лийын.
Курыкмарий районышто у водонапорный башньым ыштат. Тидлан республике Правительствын резерв фондшо гыч 2 миллион наре ойыралтеш. Тидын шотышто постановленийым регион вуйлатыше Александр Евстифеев пеҥгыдемден. Ойырымо шийвундо дене Курыкмарий Йоласалыште у водонапорный башньым ыштат. Тушто улшыжо тоштемын, аварийныйлан шотлалтеш. Садланак, у объект кӱлеш. Тудын дене кундемыште илыше-влакын пӧрталшке да социал объектлашке яндар вӱд толшаш. Тиде кундемыште 500 утла еҥ ила. 
Республикыште школ да йочасад-влакым финанс-кредит организаций полшымо дене чоҥаш палемдат. Регион вуйлатыше Александр Евстифеев тиде йодышым Марий Элыште Сбербанк отделенийын вуйлатышыже дене каҥашен. Тидын шотышто ойпидыш сай лектышым пуа гын, 2022 ий марте Килемар район Кугу Памъялыште у школым ыштен шуктат. Кызыт тудо кундемыште школ тошто, посна шогышо вич оралтыште верланен, эсогыл телым коҥгам олтат. Таче кечын тушто 60 йоча тунемеш, 20 икшыве йочасадышке коштеш. Концессий йӧн дене тунемме вер-влакым вес регионлаштат чоҥат. 
