Марий Эл гыч сатум ыштыше-влак «Российын тамже» национальный конкурсышко ушненыт. Ялозанлык министерствын палдарымыже дене, регион 12 брендым аклаш колтен. Тидын коклаште «Марий Отар» марий мӱкшызӧ-влакын брендышт. Тиде палым 2016 ийыште ыштыме. Таче кечын республикыште 2 тӱжемат 500 наре еҥ мӱкшым куча, утларакше кресаньык да фермер озанлык-влак. Мӱкшызӧ-влакын 36 тӱжем мӱкш ешышт уло.
Субсидий-влакым йодмаш дечын посна шуят. Социал вияҥмаш министерстве увертара: граждан-влакын тазалыкыштым арален кодымо шот да у коронавирус инфекцийын шарлымыжым шижтараш, вашталтыш пурен. Документын у редакцийже дене келшышын, илыме верлан да коммунальный услугылан тӱлымӧ роскотлан субсидийым пуымо жап 2020 ий 1 октябрь гыч 31 декабрь пагытыште пыта гын, субсидий эше 6 тылзылан ончычсо кугыт денак йодмаш деч посна ойыралтеш. Кугыт шотышто ойыртем уло гын, келшыше документым пуымо деч вара угыч шотлен луктыт.
Марий Элыште федерал адресный инвестиционный программым илышышке пуртымым онченыт. Тиде темым регион вуйлатыше видеоконференций йӧн полшымо дене Россий правительстве председательын алмаштышыже Марат Хуснуллин дене каҥашен. Федерал программе дене республикыште Перинатальный рӱдерым чоҥат, тудым вес ийын ыштен шуктышаш улыт. Финансированийын тичмаш кугытшо 1 миллиард 600 миллион тенге.
Марий Эл «Жилье и городская среда» национальный проектым ончылгоч мучашла. Регион вуйлатыше Александр Евстифеев ЖКХ-м реформироватлаш полшышо фондын генеральный директоржо Константин Цикин дене вашлийын. Тушто «Илымвер да оласе среда» проектым илышышке пуртымо нерген каҥашеныт. Тӱҥ шотышто аварийный илымdерла гыч еҥ-влакым кусарыме нерген ойленыт. Вашлиймаште программым ончылгоч мучашлыме шотышто ойпидышым пеҥгыдемденыт. 
