Экологий диктант. Тений российысе акцийышке онлайн йӧн дене ушнаш лиеш. Тидын дене пырля тунемме верлаште площадке-влакым ыштат.  15 ноябрьыште «экодиктант.рус» сайтыште йодыш-влак лийыт.  Шке профильышке пурен, нунылан вашешташ лиеш. Экодиктантын географийже кажне ийын кумдаҥеш. Тений тудым Российыште илыше ик миллион утларак еҥ возышаш. Школышто тунемше, студент, да чыла кумылан-влак экологий, пӱртусым аралыме шинчымашыштым терген кертыт. 

Туризм – сылне вер-влакым веле огыл, тыгак инфраструктурым уша. Правительстве кӱкшытыштӧ туризм сферым вияҥдыме стратегийым пеҥгыдемдыме. Тудын дене келшышын инфраструктурым сылныракым ыштат. Тыге лишыл ийлаште рӱдолаштат набережный турист-влаклан эшеат йӧнанрак лийшаш. Турист-влак Йошкар-Олашке веле огыл, районлашкат толыт. Марий кундемын сылне верлам чапландарыше-влаклан «В Марий Эл с любовью» фотоконкурсым увертареныт. Социал кыллаште фото-влакым хештег дене вераҥдыман. Сеҥыше-влакым икмыняр номинаций дене ойырат. 

Марий подкогыльо да Комавел сыр «Российын тамже» регионысо бренд-влакын национальный конкурсышко темлалтыныт. Подкогыльо – финн-угор калыкын сийже, марий-влак тудым шыл, торык да паренге дене ыштат. 

Шӱвырзо-влак пырля чумыргат. 19 ноябрьыште Марий Элыште «Шӱвыр» тунямбал фестиваль почылтеш. Тудо онлайн йӧн дене кум кече эрташ тӱҥалеш. Фестивальыш Марий Элын мастар шӱвырзыжӧ-влак ден пырля тыгак Германий, Швеций, Эстоний, Венгрий гыч музыкант-влак ушнат. 

«Йоча-влак – йӱд олаште». Тыгай профилактике акцийым  Марий Эылсе полицийын ийготыш шудымо-влакын пашашт шотышто подразделенийже-влакын, ППС-ын пашаеҥышт, участковый уполномоченный, наркополицейский-шамыч  рӱдолаште да районлаште эртарат.

Марий самырык тукым слётым тений шыжым эртарат. Ты гана самырык-влакын погынымашышт моло ийла деч ойыртемалтше. Кажне участник, организатор, лекцийым да мастарлык-классым вӱдышӧ коронавируслан тестым сдатлен. Слёт кылме тылзын 13-шо кечынже почылтеш. Кызыт организатор-влакын орг-йодыш-влакым рашемдат, уна-влакым вашлияш ямдылалтыт.

Самырык-влакым предприниматель лияш кумылаҥдат. «Изирак да кокла предпринимательство» национальный проект дене «Предпринимательствын популяризацийже» регионысо проект илышышке пура. Тудын дене келшышын 14 ияш гыч тӱҥалын, самырык-влак предприниматель пашалан тунемыт. Тидын жапыште онлайн йӧн дене тренинг, мастарлык класс-влак эртаралтыт. Декабрь тӱҥалтыште бизнес-проект-влакым аклаш тӱҥалыт да грантым сеҥыше-влак дене палдарат. Грант-влаклан 1 миллион теҥге палемдалтеш. 

Пашам йомдарыше-влаклан психологий полыш. Тений пашам темлыше рӱдер кум тылзыште 380 утла пашадымылан полышым пуэн. Тидын радамыште 29% - ик ий утла пашам ыштыдыме-влак, 40% – ӱдырамаш-влак, инвалид-влак – 39%. Психологий полышым пуымо дечын вара еҥ-влакын кумылышт вашталтын, шкеныштым утларак аклаш да шке вийыштлан ӱшанаш тӱҥалыныт. 

Шуко пачеран пӧртым капитально тӧрлат. 2014 ий гыч Марий Элыште «Шуко пачеран пӧртлаште олмыктымо пашам шуктымаш» республикысе адресный программе уло. Тудо 33 ийлан келыштаралтын. Программым 11 тапырлан шелыныт. Олмыктымо пашам 500 тӱжем утла калык вуча. 

Йошкар-Олашке пурымаште корным тӧрленыт. Пашам «Лӱдыкшыдымо да сай качестван автомашина корно» национальный проект дене келшышын шуктеныт. Козьмодемьянск кугорнын Строителей гыч Йыван Кырля урем марте ужашым Р-177 «Поветлужье» федерал корно дене ушнымо марте «Йошкар-Олашке пурымаш» лӱмденыт. Национальный проект дене тыште корным тӧрленыт. Чумыржо 13 километрым шотышко кондымо. Специалист-влак корно тӱрым тыгыде кӱ дене пенгыдемденыт, остановко-влакым уэмденыт, корным саемденыт.