Силикатный поселко воктене Йошкар-Ола–Зеленодольск кугорным тӧрлышаш улыт. Тидын нерген совещанийыште ойленыт. Регион вуйлатыше Александр Евстифеев «Волго-Вятскуправтодорын» вуйлатышыже Илдар Мингазов дене вашлийын. Вес ийын тиде корным «Корно сеть» федерал проектышке пуртышаш улыт.
Йошкар-Ола–Зеленодольск кугорнын ужашыжым эше 7 ий ончыч ыштеныт, тунам 6 километр наре корным у технологий дене чоҥеныт. Пашалан федерал бюджет гыч 700 миллион теҥге ойыралтын. Ончыкыжым корным умбакыже тӧрлаш шонат. Тидын нерген Россий Правительстве Председательын алмаштышыже Марат Хуснуллин дене лишыл жапыште каҥашаш тӱҥалыт. Тиде кугорно ныл полосан лиеш.
Школым тичмаш тӧрлаш. Вятский-Ӧрша-Кӧрдемтӱр корным ышташ, Петров уремым чоҥаш. Нине йодыш-влак дене республикыште илыше-влак регион вуйлатыше Александр Евстифеев деке лектыныт. Марий Эл вуйлатыше граждан-влак дене приемым эртарен. Мутлан, Йошкар-Олаште Молодежный микрорайонышто илыше-влак Шернур трактышке лекмаште корным ышташ йодыт. Вашмтутым верыштак пуэныт. Петров уремым тений чоҥаш тӱҥалыныт. План дене келшышын вес ийын шуктышаш улыт. Тиде пашам регионым социально-экономике вияҥдыме шотышто индивидуальный программе дене шуктат. Приемышко толшо вес ен Вятский-Ӧрша-Кӧрдемтур корно нерген йодын. Тудым ыштен шуктеныт, но неле транспорт коштмылан кӧра, тудо пытен. Тиде верысе калыклан йӧндымылыкым ышта. Приемышко толшылан тыгай вашмутым пуэныт-вес ийын субсидийым ойырат, да корным шыже марте пенгыдемден, асфальтым шарен шуктат.
