Самара олаште илыше-влак Марий Эл дене палыме лийыт. 10 апрельыште Йошкар-Олашке икымше туристический поезд толеш. «Яркие выходные в Приволжье» проект туризмым вияҥдаш келыштаралтын. Икымше поезд дене 342 турист толыт, нуно Йошкар-Ола, тыгак марий калыкын тӱвыра да йӱлаже дене палыме лийыт. Билет-влакым моткоч писын налын пытареныт. Поезд Самара ола гыч кугарнян, 9 апрельыште лектеш, а шуматкечын эрдене Марий Элын рӱдӧ олашкыже толын шуэш. Туроператор палемда: тӱҥжӧ уна-влакым рӱдӧ ола дене палдараш, тамлын пукшаш. Программе моткоч чот поян, экскурсий-влак дене пырля турист-влаклан фольклор коллектив-влакын усталыкыштым ончыктат. Самара гыч толшо турист-влак Шкетан лӱмеш театрыште, тӱссымыктыш галерейыште лийыт. Ешарена, «Яркие выходные в Приволжье» проект кодшо ий октябрь мучаш гыч вич регионысо туроператор-влак дене ышталтын. Турист-влак кӱртньыгорно дене Пензенский, Ульяновский областьлашке, Удмуртий, Мордовийышке миен толын кертыт. Йошкар-Олашке турист-влак дене кокымшо поезд 17 апрельыште толшаш.
Марий Элыште «День ангела» лӱман йоча да ача-ава-влакын студийже пашам ышта. Тиде проектым Йошкар-Оласе да Марий кундемысе епархий илышышке пурта. Студийышке нелылыкыш логалше икшЫве-влак коштыт. Тушто нуно сӱретлат, меж гыч панно да паша-влакым ыштат, ача-ава-влак йӱла, права дене кылдалтше йодыш-влаклан вашмутым муыт. Шукерте огыл студийышке коштшо йоча-влакын сӱретыштым православий историй тоштерыште почылтшо выставкышке чумыреныт. Ӱдыр ден рвезе-влак тӱрлӧ пайремлан келыштарыме сӱретым возеныт.
Шошымсо призыв кампаний тӱҥалеш. Владимир Путин военный службыш налме нерген Указышке кидпалыжым пыштен. Призыв икымше апрельыште тӱҥалеш да 15-ше июль марте шуйна. Тиде кампаний жапыште армий радамыш 134 560 Россий гражданиным налшаш улыт. Кеч-могай войскаште срочный службо 12 тылзе гына шуйна. Марий Элыште, мутлан, шыжым ик тӱжем утла самырык еҥ салтак радамышке ушнен.
У Торъял кундемысе тунемше Россий олимпиадын призержо лийын. Марий Эл гыч олимпиадын финалыштыже 11 тунемше уш-акылжым терга: экономике, химий, историй, руш йылме, математике, физический культур, биологий, англичан, испан йылме, технологий да географий дене. У Торъял районысо школ гыч Григорий Ложкин химий дене российысе олимпиадыште призер лийын. Тудо ик гана веле огыл школ да муниципал этапыште сеҥен. Химий дене кылым эше 8 классыште кучаш тӱҥалын, «Одаренные дети. Химия» программе дене шуаралтын. Туныктышыжо Лилия Глушкова тунемшын шонымашышке шуаш кыртмен тыршымашыжым палемда. Ешарен каласаш лиеш, Россий олимпиадын пытартыш этапыште сеҥыше да призер-влак профильный предмет дене Российысе ВУЗлашке тунемаш пурен кертыт. Олимпиадын финалже 30 апрель марте 15 регионлаште 24 предмет дене эрта.
Школым пытарыше-влаклан иктешлыше сочиненийым вес жаплан кусареныт. Тений 11 классым пытарыше-влак ЕГЭ вашеш пашам 15 апрельыште возат. Тидын дене пырля ешартыш кече-влакымат вес жаплан палемденыт. Иктаж амаллан кӧра, тунемше сочиненийым палемдыме кечын возен огеш керт, але «незачет» оценкым налеш, 5 да 19 майыште сочиненийым возаш ешартыш кече-влак лийыт. Тидын шотышто приказым правовой информаций шотышто официал порталыште савыктыме.
Республикысе стационарлаште коронавирус инфекций дене черланыше-влакым эмлаш келыштарыме эше 60 койко верым шагалемдыме. Йошкар-Оласе эмлымверыште 40 верлан, Марий Турек да Звенигово рӱдӧ эмлымверлаште 10 верлан. Тачысе кечын шым медицине организацийлаште 445 койко вер уло. Медведево рӱдӧ эмлымверыште коронавирус дене черле пациент-влаклан хирургий, акушер, неонтологий, гинекологий могырым экстренно полышым пуат. Оперативный штаб палдара: пытартыш суткаште эше кок еҥ коронавируслан кӧра ӱмыр лугыч лийын, тыге республикыште тиде черым чылаже 205 еҥ сеҥен кертде, колен. Стационарлаште 303 еҥ эмлалтеш, 69 еҥ нелын черле, 19 еҥ шодын искусственный вентиляций аппаратыште. Пытартыш суткаште тиде диагнозым 21 еҥлан шынденыт.
Йошкар-Олаште коронавирус дечын прививкым шындаш пункт Сеҥымашын кумлымшо идалыкше лӱмеш тӱвыра полатыште пашам ышташ тӱҥалын. Икымше кечынак тушко ятыр еҥ толын. Толшо-влакым эн ончыч врач онча. Тӱвыра полатыште пункт паша кечын 10 гыч 15 шагат марте пашам ышта, тушко кажне кумылан кугыеҥ прививкым шындаш толын кертеш. Пелен паспорт, полис да СНИЛС лийшаш. Кундемыште илыше-влак коронавирус дечын прививкым шындаш пункт-влакым вераҥдаш темлен кертыт. Темлымашым регион вуйлатыше Александр Евстифеевын пашаже дене палдарыше Instagram-аккаунтышто пуаш лиеш - @evstifeev.life. Нуным регионысо тазалыкаралтыш министерствышке колтат. Пандемий тӱҥалме дечын вара регионышто 30 тӱжем утла дозо «Спутник Ви» вакциным конденыт. 31 мартлан 22 тӱжемат 513 еҥ прививкым шынден, нунын кокла гыч 16 тӱжемже прививкын тичмаш курсшым эртен. Тазалыкаралтыш министерстве палдара: лишыл кечылаште прививкым шындаш пунктым Ленин лӱмеш тӱвыра полатыште почшаш улыт.
Пандемий жапыште регионышто вирусым чактарымаште тыршыше-влакын пашашт нерген Марий Эл Общественный палатын заседанийыштыже ойленыт. Регион вуйлатыше Александр Евстифеев палемден: ий гыч ийышке мер организаций-влак регионын вияҥмашыже шотышто кӱлешан йодыш-влакым рашемдымаште утларак полшат. Коронавирус инфекцийын шарлымыже чыла службо да структуро-влакым терген. Кучем дене пырля тиде черым волонтер, мер ушем, тыглай еҥ-влак шижтараш да сеҥаш полшеныт. Таче пандемий шагалемаш тӱҥалын, тыгодым тӱшка иммунитетым пеҥгыдемдаш вакцинаций полша.
Пандемий жапыште регионышто вирусым чактарымаште тыршыше-влакын пашашт нерген Марий Эл Общественный палатын заседанийыштыже ойленыт. Регион вуйлатыше Александр Евстифеев палемден: ий гыч ийышке мер организаций-влак регионын вияҥмашыже шотышто кӱлешан йодыш-влакым рашемдымаште утларак полшат. Коронавирус инфекцийын шарлымыже чыла службо да структуро-влакым терген. Кучем дене пырля тиде черым волонтер, мер ушем, тыглай еҥ-влак шижтараш да сеҥаш полшеныт. Таче пандемий шагалемаш тӱҥалын, тыгодым тӱшка иммунитетым пеҥгыдемдаш вакцинаций полша.
