Юрино поселкышто Н.В.Макарова лӱмеш йоча сымыктыш школым тӧрлатЮрино поселкышто Н.В.Макарова лӱмеш йоча сымыктыш школым тӧрлат. Тиде пашам «Культура» нациорнальный проект дене келшышын шуктат. Школ 1893 ийыште чоҥымо оралтыште верланен, садланак капитально тӧрлымӧ годым негызым пеҥгыдемдат, цокольым шотышко кондат, оралтын тӱжвал сынжым сылнештарат. Тидын дене пырля зданийыште шокшым пуышо, вӱд, канализаций системым тӧрлат. Пу дене олтымо коҥга да верандым пужат. Тыгак сымыктыш школышто кӧргӧ отделкым ыштат, автоматический сигнализацийым да видеонаблюдений системым келыштарат. Тыгак сымыктыш школ йыр печым печат. Оралтым капитально тӧрлымӧ дечын вара класслаште да хореографий залыште технологический оборудований да мебельым налшаш улыт. Пашам май гыч август марте шукташ палемдат. Тачысе кечын подрядный организацийым ойырымо конкурс мучашлалтын. Тидын нерген «Юринский рабочий» газет воза. 

Марий талешке кече лӱмеш республикыште «Талешке корно» акций лиеш. Тудо кок арня утларак шуйна, 23   апрельыште «Ший талешке» конкурс дене тӱҥалеш, да сеҥымаш кечын Чарла Кремльыште эртаралтше патриот акций дене мучашлалтеш. Талешке кече лӱмеш молгунамсе семынак «Талешке сорта» акций лиеш, тудо 26 апрельыште эрта, тиде кечын чыла кумылан-влак лӱмлӧ еҥ-влакын чапкӱ, мемориал воктеке пеледышым пыштен, марий патыр-влакым шарналтат. Тений марий тӱвыра рӱдер тыгак «Марий патыр конкурсым» эртара. Тушто шке чолгалыкыштым марий патыр-влак ончыктат. 

Марий Элыште 4 тӱжем утла еҥ самозанятыйлан шотлалтыт. 1 апрельлан ончымаште профессионал парышлан налогым 4659 еҥ тӱла. Тиде данный дене Федерал налоговый службо палдара. Республикын экономике вияҥмаш министертсвыште палдарат,  кундемыште самозанятный-влакын чотышт план дечын 23 процентым эртен. 

Лишыл жапыште еҥ-влак «Формирование комфортной городской среды» федерал проект дене келшышын, йӱклымашке ушнен кертыт. Йошкар-Олаште «Дубки» микрорайонышто кумдыкым тӱзатен кертыт. Россий Армий тӱвыра полат шеҥгелне кумдыкым шукертак тӧрлаш кӱлеш. Тиде микрорайон 90 ий ончыч вияҥаш тӱҥалын, Октябрьын 12-шо идалыкше лӱмеш заводым ыштымеке, тушто пӧрт-влакым нӧлташ тӱҥалыныт. 

Марий Эл гыч туныктышо российысе конкурсышто чолгалыкым ончыктен. Морко район гыч Фарида Фархиева «Татар йылме да литературын эн сай туныктышыжо» конкурсын росийысе этапышкыже миен да эн чолга 5 туныктышо-влак радамышке лектын, лауреат лӱмым сулен.  Ешарен кодаш лиеш, 20 гыч 23 апрель марте республикыште «Марий Элын идалыкын туныктышыжо» российысе конкурсын регионысо этапше лиеш. Тений тудо Советский поселкышто эрта. Молан манаш гын, кодшо ийыште конкурсышто сеҥыше Советский 3-шо школ гыч физикым туныктышо Ольга Анатольевна лийын. Педагог-влакым «Идалыкын воспитательже», «Марий йылмым туныктышо», «Идалыкын туныктышо» номинацийыште ойырат.  

Тений кеҥежым республике гыч 100 утла студент студотрядлаште проводниклан пашам ышташ кумылым ончыктеныт. Нуно Санкт-Петербург, Адлер, Новороссийск поездлаште пашам ышташ тӱҥалыт. Студент-влак тыге мыняр-гынат оксам ыштен налыт, а российысе кӱртьныгорно кадр-влак дефитицым петырен кертеш. Проводник лияш шонышо студент-влак тиде кечылаште тунеммашым эртат. Южо студент икмыняр кеҥеж тиде пашам шукташ шона гын, молышт икымше гана студотрядлашке ушна. Марий Элыште икмыняр студотрядым чумырат, ӱдыр ден рвезе-влак лагерьлаште вожатыйлан пашам ышташ тӱҥалыт, тыгак чоҥышо-влакын отрядышт лийыт. 

Март тылзыште республикыште чыве муно, сакыр, чыве шыл шергештын. А теве кешыр, йошкарушмен, ковышта, шоган, олмалан ак шулдештын. Киярын акше -24 процентлан волен, а эн чот мартыште пеледыш -16 процентлан –  шергештын. Тидын нерген Маристат палдара. Эм препарат-влаклан ак вашталтын огыл, южыжо мӧҥгешла, шулдештыныт. Туризм да каныш сфере нерген ойлаш гын, кинотеатрышке билет 6 процентлан шергырак лийын, санаторийыште каналташланат, ончычсо дене таҥастарымаште 3 процентлан шукырак тӱлаш логалеш. 

Кундемыштына 31 тӱжем утла еҥ коронавирус дечын прививкым шынден. У инфекций дечын прививике полшымо дене аралалташ куштылгырак лийын. Республикыште стационарный да выездной пункт-влак пашам ыштат, тыгак мобильный бригаде-влак районлаште илыше-влакым вакцинацийышке наҥгаят. 

Марий Эл вуйлатыше Александр Евстифеев регионысо вияҥмаш шотышто Россий правительстве комиссийын заседанийшкыже ушнен. Видеоконференций йӧн дене тудым Правительстве Председательын алмаштышыже Марат Хуснуллин эртарен. Тӱҥ йодыш семын – корно паша сферыште субъект-влак нерген мутланеныт. 

Фигурантом уголовного дела стал 22-летний житель поселка Мари-Турек, сообщают в региональной прокуратуре.