"Российын сулло журналистше" лӱмым Марий Эл газетын журналистше Юрий Исаков сулен. "Марий Эл" газетын коммерческий йодыш дене редакторжо Юрий Валентинович Исаковлан Россий Президент Владимир  Путинын 2021 ий 6 апрельыште лекше Указше дене келшышын отечественный журналистикым вияҥдыме суапшылан да ятыр ий тӱвыргӧ лектыш дене пашам ыштымыжлан "Россий Федерацийын сулло журналистше" чап лӱмым пуымо! Юрий Валентинович - марий мутын ямжым шижын, шочмо йылмынан яндарлыкшым арален возышо мастар. Марий журналистикыште шукыштлан пример.
 Юрий Исаков - Марий Элыштына тыгай кӱкшытан лӱмым налшыже гыч кокымшо. Икымшыже -  "Волжская правда" газетын тӱҥ редакторжо -  Александр Лукаев.

Йоча-влакын кеҥеж канышыштлан ямдылалтыт. Тидын нерген Россий Правительстве председательын алмаштышыже Татьяна Голикован совещанийыштыже мутланеныт. Тудын пашашкыже Александр Евстифеев ушнен. Тений Марий Элыште кеҥеж каныш жапыште  йоча-влакым 184 организацийыште вашлийыт, тушто 16 тӱжем утла икшыве канышаш. Ончычсо семынак профильный лагерь-влакат пашам ышташ тӱҥалыт. Мутлан, «Радужный» рӱдерыште 5 профильный смене лиеш. Кундемыште 42 тӱжем утла йоча кечывал лагерьлаште канаш да тазалыкыштым шуараш тӱҥалыт,  2 тӱжем утла еҥ республике дечын ӧрдыжтӧ канышыш , 300 утла еҥ «Артек», «Орленок», «Смена», «Сириус» федерал рӱдерлашке канаш кая. 

Российысе акций жапыште рӱдӧ оласе кадет класс, патриот клублаште шуаралтше-влак Воин чап монумент воктене шогат. 10 май марте почетан караул вахтым кучаш тӱҥалеш. Тидын вашеш сеҥымашын кумлымшо идалыкше лӱмеш тӱвыра полатыште патриот клуб-влакын слетышт эртен.

Сеҥымаш парад 9 майыште 11 шагатлан тӱҥалеш. Тудым МЭТР телеканал вияш эфирыште ончыкта. Икымше репетиций-влак эртеныт, тыгак 28, 30 апрельыште, 4 да 7 майыште репетиций-влак лийыт. 

«Оласе йырвелым йӧнаным ыштымаш» федерал проект дене келшышын, 2022 ийыште тӱзатышаш кумдык-влак верч йӱклымаш тӱҥалын. Республикыште тӱзатышаш объект –влак верчын 4 тӱжемат 500 утла еҥ йӱклен. 

Республикыште посна противопожарный режимым пуртымо. Игече юалге да вӱдыжгӧ гынат, кундемыште пожар-влак шукемыт. Тидын нерген правительстве заседанийыште Республике правительстве Председательын алмаштышыже Степан Воронцов палемден. 4 кече жапыште 106 гана тул ылыжын, 81 гана шудым да шӱкым йӱлалтымылан кӧра. Кодшо арняште 76 тулазап лийын. Волжск, Йошкар-олаште, тыгак Курыкмарий, Звенигово да Медведево районлаште пожар-влакын чотышт шукемын. 

Александр Евстифеев правительствын заседанийжым эртарен да палемден: республикысе кучем Президентын кӱштымашыжым шуктымашке кӱчык жапыште ушнышаш. 

 Республикыште илыше-влак ветеран-влаклан полышым пуышо «Красная гвоздика» российысе патриот акцийышке ушнен кертыт. Тудо мемнан республикыште 27 апрель гыч 22 июнь марте эрта. Акцийышке ушнаш шонышо-влак йошкар гвоздике палым налшаш улыт. Тудым онлайн кевытлаште але супермаркетлаште оксала налаш лиеш. Тиде акций дечын погымо оксам ветеран-влаклан кӱкшо технологиян медицин полышлан колтат. Ешартыш увер :  гвоздика.рф сайтыште. 

Мер каҥашын шошо сессийыже еш, шочмо йылме да туныктымаш йодышлан пӧлеклалтын. Тиде форум кышкарыште Юмынйӱла ушемын 30 ий теммыжлан пӧлеклалтше конференций лийын. Российын тÿрлö кундемлаж гыч:   Башкортостан, Татарстан, Удмурт, республикыла, Киров, Свердловск, Угарман да моло кундемла гыч онаеҥ-влак пырля чумыргеныт.

Ижевск олаште «Театральное Приволжье» конкурсым иктешленыт. Тудо Юл кундемысе федерал округын чыла регионлаштыже эртен. Тушко самырык да школысо 416 театр ушнен. Сеҥыше-влакым саламлымашке Юл кундемысе федерал округышто Росий Президентын ӱшаеҥже Игорь Комаров ушнен. Лауреат-влак радамыште Марий Эл гыч коллектив-влак улыт. Медведево поселкысо  калык театрын Сеҥымашын 75-ше идалыкше лӱмеш шындыме «У войны не женское лицо» постановкыжо «Самырык-влаклан эн сай спектакль» номинацийыште кокымшо вер дене палемдалтын.