Йошкар-Олаште мемнан кундемын шочшыжо-влак нерген у книган презентацийже лийын. «Вернуться из плена» савыктышышке Марий АССР гыч ик тӱжемат 500 утла салтакын лӱмыштым пуртымо. Справочник немыч, финн, румын пленлаште индыралт колышо салтак-влаклан пӧлеклалтын. Тиде книгам «Демос» кычалше отрядын боецше-влак ямдыленыт. Книган презентацийыштыже отрядын командирже Дмитрий Шипунов мемнан дене пленыште улшо немыч салтак да совет салтак-влакым таҥастарен. Гитлеровец-влак эсогыл южгунам пашам ыштымыштлан пашадарым налыныт, а пленыште улшо совет салтак-влак каҥгешт пытыше,  шапалгыше чуриян историйышке возалтын кодыныт. 

Историй шотан акций Российыште кумшо гана эртен. Учстник-влак 45 минутышто   25 йодышлан вашештеныт. Теме-влак тӱрлӧ лийыныт, Совет Союзын геройжо, Кугу Отчественный сарыште кредалмаш-влак да молат. Марий Элыште площадке-влак  школ, ВУЗ да СУЗ-влак пелен лийыныт. Йошкар-Олаште  «Точка кипения» да С.Чавайн лӱмеш книгагудышто. 

Сеҥымаш диктантым Марий Эл Кугыжаныш Погынын депутатше-влакат возеныт.  Нунат Сеҥымаш кече вашеш Кугу Отчественный сар теме дене кылдалтше йодыш-влаклан вашмутым пуэныт. 

Йошкар-Олаште южо кок ияш икшыве-влаклан йочасадлаште верым пуат. Тидын нерген 2020 ийысе пашам иктешлыме годым мэр Евгений Маслов увертарен. Инвесторын полшымыжо дене «Фестивальный», «Мышино» да 9Б микрорайонлаште йочасад-влакым чоҥышаш улыт. 2020 ийыште рӱдо олаште у школ почылтын, 7-ше номеран школым капитально тӧрленыт. Тений рӱдӧ олаште «Юбилейный» микрорайонышто «Синяя птица» гимназий шеҥгелне 825 верлан эше ик школым чоҥышаш улыт. Тидын дене пырля эше ныл школым чоҥаш мландым палемдыме, нунын дене проект-смете документацийым ямдылат. Йошкар-Олаште 1800 верлан IT-направлений дене частный специализированный школым чоҥышаш улыт. Тиде республикыште да Юл кундемыштат ик эн кугу школ лийшаш.

Йошкар-Олаште тений кеҥежым 28 тӱжем утла икшыве тӱрлӧ лагерьлаште канышаш, тидлан 12 миллион утларак тенге ойыралтеш. Икшыве-влакын кеҥеж канышышт, тыгак рӱдо олан социал-экономике могырым вияҥмашыже нерген Оласе погынын черетан заседанийыштыже ойленыт. Мэр Евгений Маслов 2020 ийысе пашам иктешлен. Рӱдӧ олаште ятыр проект илышышке пура, тиде очистной сооруженийын модернизацийже, Киров –Строитель-влак уремлам ушышо магистральым чоҥымаш, социал инфраструктурым вияҥдыме паша. Тений Йошкар-Олаште 22 километр корным тӧрлат, шукыжым «Лӱдыкышыдымӧ да сай качестван автомашина корно» национальный проект дене келшышын. 

Пожарым йӧртышӧ-влакын профессионал пайремышт вашеш пожарный да утарыше-влаклан чапкӱм почыныт. Тудо Йошкар-Олаште Воскресенский паркыште верланен.  Памятникын негызышкыже икымше кӱйым 2017 ийыште пыштеныт, тудын дечын вара конкурс эртен. Памятникым сӱретче-влак Анатолий Ширнин да Сергей Яндубаевын проктше дене ыштеныт. Памятник  тыныс илышын геройжо-влаклан пӧлеклалтын, тушто утарыше кидыштыже йочам кучен шога, шеҥгелныже тулойып коеш, воктеныже тудын полышкалыше пий. Памятникым почмашке регион вуйлатыше Александр Евстифеев, тыгак республикын сенаторжо-влак Константин Косачев да Сергей Мартынов ушненыт да пожарым йӧртышӧ-влакым профессионал пайремышт дене саламленыт. 

Тений республикыште «Илымвер да Оласе среда» нацпроект дене келшышын, тоштемше пӧртла гыч 195 еҥым у  йӧнан илымверышке кусареныт. Тиде проект нерген регион-влакын вияҥмашышт шотышто правительстве комиссий президиумын заседенийыштыже каҥашеныт. Видеоконференцийым Марат Хуснуллин эртарен. Совещанийышке регион вуйлатыше Александр Евстифеев ушнен. Мемнан республикыште 2019 гыч 2023 ий марте 8801 квадрат метр тоштемше илымверла гыч 643 еҥым кусарышаш улыт, 179 пачерым налаш контрактым пеҥгыдемдыме, эше 72 еҥ оксам налын. Лишыл ийлаште республикыште илымверым утларак чоҥаш палемдат, тений план дене 363 тӱжем квадрат метр илымверым ыштышаш улыт, 2027 ийыште тидын дечын кокшудӧ тӱжем квадрат метрлан шукырак. Йошкар-Олаште 2023 ий марте аварийныйлан шотлалтше 63 пӧртла гыч еҥ-влакым кусарышаш улыт.   

 Гармоньчо-влак Василий Теркинын Кубокыштыжо вашлийыныт. Регион-влак кокласе конкурс Шернурышто кокымшо гана лиеш. Тудын вашеш конкурсышко ойырымо этап-влак эртат, кодшо кечылаште иктыже лийын.  Шернур тӱвыра полатыште Волжский, Морко, Советский районла гыч команде-влак вашлийыныт, икмыняр шке шотан таҥасымаште усталыкыштым ончыктеныт. Тиде, мутлан, калык куштымашым шоктымаш, тыгак Шернур районын 100 ийжылан пӧлек, сар але Сеҥымаш нерген муро. Тиде фестиваль икымше гана 2019 ийыште эртен, тунам Василий Теркинын Кубокшым да гармоньым Шернур районын командыже сеҥен. Лишыл тылзылаште ойырымо этап-влак эртат, а вес ийын Кубокын финалже лиеш. 

В четверг на улице Строителей микрорайона «Интеграл» посадили 76 каштанов, сообщают в городской мэрии.

Спортым кӱкшышышкӧ нӧлталаш у йӧн, тидын годым тазалык дене эмганен вияҥше-влакланат тӱткышым ойырат. «Демографий» национальный проект дене келшышын, спорт организаций-влаклан кугыжаныш полыш ойыралтеш. «Паролимпийский резерв шотышто спортивно-адаптивный школ» кумшо ий почела экипировкым да оборудованийым уэмдаш субсидийым налеш. Республикыште базовый спортын 11 тӱрлыкшӧ  шотлалтеш. Сокыр-влакын спортышт да эше кандаш дисциплине у инвентарь да экипировко дене пойдаралтыт: дзюдо дисциплинын спортсменже-влаклан професисионал кимоно, иймаш дене кылым кучышо-влаклан тӱрлӧ спорт инвентарьла. Тений республикыште спорт организаций-влаклан полыш семын 3 миллион утларак тенге толын, спортивно-адаптивный школлан 200 тӱжем утла теҥге. Тиде окса дене у инвентарльым налыныт. Тудо самырык спортсмен-влакын кӱкшыштым кугемдаш полша. 

Республикын кугыжаныш архивыште «Тӱрлӧ культур, йӱлалан пӧлеклалтше йыргешке ӱстел» эртен. Тушто кугыжаныш, йӱла, тӱвыра пашаеҥ, шанчызе, архивист-влак чумыргеныт.