10 июнь гыч Казахстан республикын Актау олаште кросс-кантри ралли дене тÿнямбалсе чемпионатын икымше этапше эртен. Таҥасымаште Йошкар-Ола гыч Александр Максимов «Чыр Мари» республикысе команде дене пырля ÿчашен да той медальым сенен. 5 кече жапыште мемнан землякна Ямаха Раптор 700 квадроцикл дене 2 тÿжемат 500 километр корным кудалын эртен. Маршрут неле лийын, тудо Казахстанысе степьыште эртен. Чемпионатыште чылаже FIA-н – рушлаже, «интернациональный автомобильный федерацийын» - 41 экипажше, 14 мотоцикл ден 4 квадроцикл участвоватлен. Чылаже 33 эл гыч 106 спортсмен лийын. Александр Максимов мланде шарын эн тале пилотшо да командыж дене ÿчашен. Туге гынат, тыршымашыже арам лийын огыл. Марий Элын шочшыжо той медальым сеҥен кертын.
Шке проектыштым темленыт да президентын грантшым сеҥеныт. Тиде – Хант-Манси автоном округышто илыше марий-влак нерген. Каласыман, икмыняр ий ончыч нуно посна ушемыш чумыргеныт. 2019 ий гыч регионысо организацийым вуйлаташ чолга марий ÿдыр, Параньга районын шочшыжо Раисия Сунгуровалан ÿшаненыт. Тений Югра кундемыште марий-влакым ушен шогышо "Марий ушем" организаций кок проектым илышыш шыҥдара. Нуным Сургут ола кумдыкышто шыҥдарат. А оксажым Сургут оласе администраций ойырен. Икымше проект «Знай этно и улыбайся глазами на языке дружбы» маналтеш. Тений тиде проект эше Президентын грантшым сенен. Проектын кугытшо – ик миллион теҥге наре. Тудым 2021 ийын кокымшо пелыштыже да 2022 ийын икымше пелийыштыже илышыш шыҥдарышаш улыт.
Шуко шочшан Рыбаковмыт еш «Успешная семья Приволжья» конкурсын регионысо этапышыштыже сеҥен. Елена ден Александр Оршанке районышто ынде 23 ий пырля илат. 2018 ий гыч ашнаш налме 7 ÿдыр-рвезым ончен-куштат. Рыбаковмыт кажне кечылан куанен илат, жапым оҥайын да пайдалын эртарат: киношко, театрышке да тоштерышке лектын коштыт, колым кучаш, чодыраште, яндар южышто лияш йöратат, велосипед дене кудалыштыт. Тыгак мöҥгыштышт кугу озанлыкым кучат. «Успешная семья Приволжья» конкурсын округысо этапше Чебоксар олаште 7-8 июльышто эрта.
Эртыше кечылаште, 12 гыч 14 июнь марте, кундемнан кугорнылаштыже машинам йӱшывуя виктарыше 34 еҥым кученыт. Тыгеракын Кугыжаныш автоинспекцийын пашаеҥышт 770 утла корно правил пудыртымым шекланеныт. 5 еҥлан уголовно муткучаш верештеш, молан манаш гын, нуно йӱшывуя машинам виктараш ик гана логалме деч вара уэш шинчыныт. Корно туткар деч поснат каныш кече-влак эртен огытыл.
Марий Элыште илыше-влакым «Шарнымаш сорта» онлайн-акцийыш ушнаш ÿжыт. Поро йÿлашке пурышо, патриотизм шÿлышан акций тений онлайн-форматыште «Шарнымаш да ойгырымаш кече» вашеш лиеш. 15 гыч 22 июнь марте чыла кумылан-влак деньпамяти.рф проектын сайтыштыже символический сортам чÿктен кертыт. Кажне виртуал сорта – тиде ик теҥге, тудым Кугу Ачамланде сарын ветеранже-влаклан медицине полышым пуаш колтат. Акцийын организаторжо – «Память поколений» поро кумылым ончыктышо фонд. Тудым 2015 ий 22 июньышто почыныт. 6 ий жапыште ик миллиардат 700 миллион теҥгем погеныт да 15 тÿжем утла ветеранлан полшен кертыныт.
Марий Элыште кум кÿртньыгорно вончымаште видеокамер-влакым вераҥденыт. Тиде – Волжск олаште, Карл Маркс уремыште да Куяр поселко воктене. Лачак нине вер-влак аварий лÿдыкшылан шотлалтыт. Кажне комплекс ныл камер гыч шога. Кокыт – корно пудыртымашым войза, эше кокытшо – йырваш улшо сÿретым ончыкта. Автомашинан кайыме писылыкше, корно пале ден разметкым эскерымаш, светофорын йошкар сигналжылан кудалын эртымаш – видеокамер-влак чыла тидым палемдат. «Лÿдыкшыдымо да сай качестван автомашина корно» нацпроектлан кöра ончыкыжым камер-влакым республикысе чыла кÿртньыгорно вончымаште вераҥдат.
Республикыште «Демографий» нацпроект почеш паша кÿлынак шукталтеш. 2018 гыч 2021 ий марте йочам школ деч ончыч тÿрлö могырым шуарыше учрежденийлаште 2 тÿжемат 750 верым почыт. Марий Элым вуйлатыше кызытсе жапыште Йошкар-Ола ден Медведево посёлкышто чоҥалтше садик-влакым ончен лектын. Тыге, рÿдолаште «Мирный» микрорайонышто йочасадым 320 верлан келыштарат. Тиде объект моткоч кÿлеш, молан манаш гын, пытартыш ийлаште тыште шуко пачеран ятыр пöрт нöлталтеш, икшыве-шамыч шочыт. Куандара, йочасадым график почеш жапыштыже чонат.
Вес йочасад Медведево посёлкышто чоҥалтеш. Тушко ончыкыжым 100 ÿдыр-рвезе кошташ тÿҥалеш. Тудым ончен лекмеке, Александр Евстифеев икмыняр ситыдымашым палемден коден.
Коронавируслан кöра кундемыштына у чараклымаш-влакым пуртат. 15 июньышто регионым вуйлатыше Александр Евстифеев 2020 ий 17 мартыште лукмо «Марий Эл Республикыште утларак ямде улмо режимым пуртымо нерген» указышке вашталтышым ешарен. Тудын дене келшышын, 15 июнь гыч 5 июль марте организаций вуйлатыше-влаклан 30 процент пашаеҥым, тыгак 65 ияш деч кугырак ийготан да хронический черан еҥ-влакым дистанционный режимышке колташ темленыт. Тиддеч посна коронавирус дечын прививкым шындашлан кумылаҥдыме пашамат шукташ кÿштеныт.
