Марий Элыште Юл кундемысе регионлаште ик эн шулдо торт-влакым кӱэштыт. Маристат тортын кечыже лӱмеш тамле сийын акшым шотлен луктын. Эн шергакан торт Юл кундемыште Самарский областьыште, ик килограммлан 619 теҥге, а Марий Элыште 384 теҥге. Кодшо ийын кондитерский фабрике-влак 1550 тонн торт да пирожоный-влакым луктыныт.
Йошкар-Олаште кумдыкым шотдымын кучышо-влакым муткучаш шогалтат. Рӱдолан тергыше пӧлкаже кумдыкым тӱзатыме правилым шеклана. Май гыч комиссий 36 протоколым возен, правилым пудыртышо-влаклан штрафым пуэныт. Мэрийыште ушештарат: кундемым тӱзатыме шотышто правилым физический да юридический лица-влакат шуктышаш улыт. Кеҥежым жапыштыже шудым солыман, тудо 15 сантиметр дечын кужу гын, кораҥдыман. Тыгак шӱкым кышкаш огеш лий. Йошкар-Олаште пашам ыштыше чыла юридический лица-влакын регионысо оператор дене пеҥгыде коммунал шӱкым лукташ ойпидышышт лийшаш.
Марий Турек районысо Сардаялыште школым чоҥаш тӱҥалыныт. Тидын нерген район администраций палдара. Школым «Образований» нацпроект дене келшышын «Современная школа» регионысо проект почеш чоҥат. Тушто 60 верлан школ да 20 верлан йочасад лийыт. Федерал, республике да районысо бюджетла гыч тиде пашалан 175 миллион теҥгем ойырат. Пашам тений декабрь марте мучашлышаш улыт. Ушештарена, ты марте Сардялыште йоча-влак тошто 100 ий ончыч чоҥымо оралтыште тунемыныт.
Республикыште 104 тӱжем утла кугыеҥ коронавирус инфекций дечын прививкым шындыктен. Тиде план дечын 33 процент. Роспотребнадзор палдара:, прививкым ыштыктыше-влак гыч 45 процент, але 47 тӱжем утла - 36-59 ияш-влак улыт, 60 ий дечын кугырак ийготан-влак гыч 39 процент прививкым шындыктен. Шукынжо республикыште «Гам-КОВИД-Вак» але «Спутник V» дене вакцинацийым эртеныт. Республикыште илыше 70 тӱжем утла еҥ тичмаш курсым эртен.
Александр Евстифеев эртыше кечылаште Козьмодемьянскыште лийын. Икымше объект – чоҥен шуктыдымо 5 пачашан 60 пачеран пӧрт. Тушто ондалалтше дольщик-влак уке улыт, но пӧртым чоҥен шуктыман. Тыге регион вуйлатыше иктешлен.
Александр Евстифеев «Юбилейный» стадионышто лийын. Оласе спорт объектым икмыняр этап дене ыштеныт, 2019 ийыште шуко функциян площадкым чоҥеныт, асфальтым шареныт, кодшо ийын 28 апрельыште стадионным ыштыме кокымшо этап тӱҥалын, но пашам удан шуктымылан кӧра, объектым жапыштыже ыштен шуктен огытыл. Спорт министр да Козьмодемьянск олан мэрже ӱшандареныт: 30 июль марте стадионын кокымшо черетшым ыштен шуктат.
«Спорт-илышын нормыжо» регионысо проект дене келшышын, Юрино поселкышто у стадионым почыныт. Пашалан 1 миллион теҥге ойыралтын. Стадионышто кугу футбол пасу, тыгак волейбол да баскетбол площадке-влак улыт, ончышо-влаклан трибуно келыштаралтын. Спортплощадыкыште синтетический шартышым ыштеныт. Республикын самырык-влак политике, спорт да туризм министр Лидия Батюкова палдарен: стадионышто баскетбол, волейбол, футбол, куштылго атлетике дене занятий-влак эртаралташ тӱҥалыт. Регион вуйлатыше районышто илыше-влаклан сеҥымашым тыланен да мече-влакым пӧлеклен. Юрино районышто 22 спорт объект уло, 2019 ийыште школ пелен ГТО нормативым сдатлаш площадкым почыныт.
Регион вуйлатыше Юрино районышто паша дене лийын. Ик эн ончыч Марьино-Юрино автомашина корно тӧрлымым ончен. Тиде корным икмыняр ий ышташ палемдыме, тачысе кече марте 25 километр гыч 16-шым ыштыме, вес ийын пашам мучашлат. Тений план дене ыштышаш корным, регион вуйлатышын кӱкштымашыже дене, ончылгоч чоҥеныт. Юрино поселкышто тыгак Кочетов уремыште корным тӧрленыт. Тидлан 9 миллион теҥге ойыралтын. Рӱдӧ уремлан шотлалтше 8 километрым шотышко конденыт. Тений тыгак «Поветлужье» Нижний-Новгород-Йошкар-Ола кугорным тӧрлат, план дене Копорулиха-Озерки марте 47 километрым тӧрлышаш улыт.
