Сарын икымше кечынжак 100 утла доброволец фронтыш тарванен. Звенигово район гыч кугу Ачамланде сарыш 8 тӱжем утла еҥ каен. 5 тӱжем утла салтак сӧй пасушто вуйжым пыштен, 2 тӱжем утла салтак увер деч посна йомын. 5 еҥ Совет Ушем Герой лӱмым сулен. Таче Провой кундемын геройжо-влакым 40 утла обелиск шарныкта. Сар жапыште Звенигово районышто эвакогоспиталь пашам ыштен. Тушто 10 тӱжем утла сусыр еҥ эмлалтын, 5 тӱжем наре операцийым эртареныт. Судостроительный заводышто 65 тӱжем наре авиабомбо корпусым да 95 аэроиздерым ыштеныт. Сар жапысе йӧсӧ илышым муниципал кундем-влак «Сеҥымаш Салют» фестиваль кышкарыште ончыктат.