Республикыште коронавирус дечын вакцинацийым шукемдат. 28 июньысо данный дене келшышын, Марий Элышке 88 тӱжем комплект вакцине толын. Икымше компонент дене прививкым 74 тӱжем утла еҥ ыштен, кокымшо дене – 58 тӱжем наре. Тидын нерген регион вуйлатыше Александр Евстифеев Россий Правительстве Председательын алмаштышыже Татьяна Голикован эртарыме совещанийыштыже палемден. Тачысе кечын мемнан кундемыште прививкым 110 пунктышто ыштат, нуно 19 медицин организацийыште улыт. Тыгак кугу сатулымо рӱдер, яллаште, сад товариществылаште, предприятийлаште 64 мобильный бригаде пашам ышта. Пытартыш жапыште республикыште ковид дене черланыше-влак шукемыт, инфекционный стационарлаште 1370 койко вер уло, тушто 1100 утла пациент эмлалтеш. Тений гына коронавирус инфекцийым шижтараш да эмлаш республикын бюджетше гыч 92 миллион теҥге ойыралтын. Тиде окса дене медицин пашаеҥ-влаклан аралтыш средствым, тыгак эм препарат-влакым налыныт. Шийвундо коронавирус инфекций дене черланыше медицин пашаеҥ-влаклан компенсацийым тӱлаш ойыралтын.
Комментариев: 0