Марий Турек районысо Сардаял школышто шинчымашым погышо-влак кумшо четвертьым у тунемме верыште тӱҥалын кертыт. 600 утла еҥан ялыште школым 120 ий ончыч чоҥымо, лишыл жапыште икшыве-влак у оралтыште шинчымашым погаш тӱҥалыт. Проект дене келшышын школышто 60 икшыве шинчымашым погаш тӱҥалеш, тыгак 20 ӱдыр-рвезылан йочасад группо лиеш. Кызыт тушто 34 йоча шинчымашым пога, нунын дене 11 педагог пашам ышта. Кодшо ийын Марий Турек районысо Сардаял школлан регионысо инноваций площадкын официал статусшым пуэныт. Тунемме вер негызеш усталык площадке да мастерской-влак лийыт. Ӱдыр-рвезе-влакым фолькор, усталык, кидпаша деке утларак шӱмаҥдаш тӱҥалыт. Сардаялыште школым чоҥаш республикысе бюджет гыч 170 миллион теҥгем ойырымо.
Комментариев: 0