Курыкмарий районысо Сумки селаште шӱгарлаште верланыше часамлам олмыктеныт. Кодшо ийын, шыжым, ты часамлаш коштшо-влак Юрино селасе Михайло-Архангельск храмын настоятельже, юмынъеҥ Николай Барсуков деке йодмаш дене миеныт. Нуно Курыкмарий районысо Сумки селасе часамлам олмыкташ кӱлмӧ нерген ойленыт. Тиде йодмаш шукталтын. Часамлан шогымо верыштыже 1713 ийыште Шнуй Шочынаван шочмыжо лӱмеш икымше храмым нӧлташ тӱҥалыныт. У полатым 1812 ийыште чоҥаш тӱҥалыныт да 1824 ийыште пытареныт. Марий митрополийын увертарымыж почеш, шӱгарла покшелне шогышо черкын алтарный ужашыж деч молыжым чыла пужымо. Лач тудымак часамлаш савырыме. Но, Шупашкар ГЭСым чоҥымылан кӧра Сумки селаште вӱд ташлен, тидлан кӧра шуко еҥ шке шочмо вержым коден каен. Тидым ончыде, храм ден часамла аралалт кодыныт. Шочмо кундемышкышт толшо-влак июль тылзын пытартыш рушарнян погынен, шӱгарлаште верланыше часамлаш да родо-тукымыштын шугарышкышт миен толыт.
Комментариев: 0