Йоча ден самырык театр коллектив-влак черетан таҥасымаште шке мастарлыкыштым тергат. Юл кундемысе федерал округышто «Театральное Приволжье» фестивальын муниципал этапше тӱҥалын. Кызыт усталык коллектив-влак йодмашым колтат. Марий Элын чапшым округ кӱкшытыштӧ йоча да самырык-влакын кок коллективше аралаш тӱҥалеш, нунын лӱмышт декабрь мучаште пале лиеш. Жюри конкурсыш темлыме спектакльын тӱҥ шонымашыжым, артист-шамычын мастарлыкыштым, режиссурым акла. Регионысо этапыште сеҥышым палемдымеке, постановко-влакын видеоштом «Театральное Приволжье» фестивальын сайтышкыже луктыт. Сеҥыше-влакым шым номинацийыште вес ийын шошым, театрын кечынже увертарат да у постановкым шындаш окса премий дене палемдат. Ий еда «Театральное Приволжье» фестивальыш Юл Кундем федерал округын регионлаж гыч 400 наре коллектив ушна. Ӱмаште Марий Элын чапшым театр таҥасымаште «Дебют» да «Спутник» театр-влак араленыт. Икымше гана «Театральное Приволжье» 2019-ше ийыште лийын. Тудым ПФО-што Россий Президентын ӱшанеҥже Игорь Комаров эртараш темлен.
Комментариев: 0