Еҥ-влак вес ийын тӱзатышаш кумдыкым ойырен кертыт. 15 апрель гыч Йошкар-Олаште, Волжскышто, тыгак Медведево поселкышто «Оласе йӧнан средам ыштымаш» проект дене кумдык-влакым ойырат. Йӱклымашым Кече дечын жапым ончыктышо шагат воктечын тӱҥалыныт. Тиде верым 2017 ийыште Йошкар-Олаште ты программе почеш ик эн ончыч тӱзатеныт. 14 ий дечын кугурак кажне кумылан еҥ «Городская среда» сайтыште йӱклен кертеш. Тыгак Кугу ужалыше рӱдерлаште, МФЦ-ште волонтер-влак полшаш тӱҥалыт. Тыгайже Марий Элыште 300 наре еҥ. Рӱдӧ олаште рейтинг йӱклымашке 9 кумдыкым темленыт. Тиде кӱртньыгорно вокзалыште, тыгак Воин-десантник-влак лӱмеш сквер-влак, Марий паркын кокымшо этапше, Комсомольский уремыште йоча спорт площадке, Тарханово парк да молат. Рейтинг йӱклымаш 31 май марте шуйна.
Комментариев: 0