Пытартыш кечылаште республикыште коронавирус дене черланыше-влакын чотышт шагалемеш, кажне кечын 15 гыч 17 еҥ марте еҥын коронавирусым пеҥгыдемдат. Тидын нерген Роспотребнадзорын вуйлатышыже Светлана Булатова увертарен. Тазалык аралымаш министр Марина Панькова ешарен: «Эмлымверышке логалше-влакын состоянийышт неле. Инфекционный стационарыште 280 еҥ эмлалтеш, улшо вер гыч 52 процентым авалтеныт, эмлымвераште улшо-влак гыч 99 % пневмоний. Ик суткаште эмлымверышке логалше-влак гыч 80 % состоянийже неле. Тидлан икмыняр амал уло: вес кундемлаште канышке-влак мӧҥгеш пӧртылыт, нуно илалше кова-коча дене вашлийыт, пытартыш жапыште илалше-влак коклаште шуко еҥ нелын черлана». Марий Элын вуйлатышыже А.Евстифеев санитар правилым шуктымо, вес кундемла гыч толмо годым еҥ-влак дене вашлиймашым шагалемдаш кӱлмӧ нерген ойлен. Оласе округ да районлаште парк, сквер, аттракцион, тӱшкан пайдаланыме транспорт, автовокзалышке пурымо верым дезинфицироватлышаш улыт.
Комментариев: 0