Волжскышто школын у корпусшым почшаш улыт. Тыгак оласе йӧнан средам ыштыме шотышто российысе конкурсышто сеҥыме проектым илышышке пурташ палемдат. Регион вуйлатыше Александр Евстифеев 5-ше номеран школын чоҥалтше кокымшо черетшым ончалын. Тушто пашам лишыл жапыште мучашлат. Икмыняр жап ончыч регион вуйлатыше Волжскыш миен. Тидын дечын вара школышто у оборудованийымат вераҥдаш тӱҥалыныт. Александр Евстифеев физике, химий, биологий кабинет, актовый да спортивный залым ончен, школ йыр кумдыкым аклен.
Марий Эл вуйлатыше олан вияҥмыжым палемден. Пытартыш жапыште гына оласе стадион почылтын, коммуникацийым тӧрлат, кугу йочасадым ыштеныт, школ чоҥалтеш, тыгак роддомым ыштышаш улыт. Волжскышто оласе корнымат тӧрлат. Ончысо ийлаште тидлан окса ойыралтын огыл гын, 2017 ийыште 20 миллион, а тений 60 миллион, вес ийланат тынарак шийвундо корным чоҥаш да тӧрлаш ойыралтеш. Ончыкыжым Волжскышто ече роллерн трассе лийшаш.
Весымат палемдыман, Волжск ола йӧнан оласе средам ыштыме эн сай проект шотышто российысе конкурсышто сеҥен. Россий Правительстве Председатель Михаил Мишустин постановленийым пеҥгыдемден. Тиде проект дене Тумер отым тӱзатышаш улыт. Регион вуйлатыше тушко лектын. Тиде верым арам огыл ойыреныт. Тыште лияш еҥ-влак йӧратат. Паркын кумдыкшо 5 гектар. Тушто йолын кошташ корным, канаш верым ыштат. Тыгак Волжскышто илыше-влак ер воктене жапыштым эртарен кертыт. Проектым кок ийыште ыштен шуктышаш улыт.
Комментариев: 0