Шкетан лӱмеш марий драме театрын артистше-влак Крымышке чоҥештеныт. Тушто «Крымская театральная осень» Российысе национальный театр-влакын фестивальже эрта. Тудо Сеҥымашын 75-ше идалыкшылан пӧлеклалтын. Марий театрын артистше-влак 5 сентябрьыште Керчь оласе «Корабел» тӱвыра полатын сценыштыже Александр Островскийын «Снегурочка» спектакльжым ончыктат. Фестивальышке тыгак Чеченский республике, Калмыкий, Татарстан, Чуваший, Тува, Башкортостан, Карелий гыч коллектив-влак чумыргеныт. Тушто руш да совет жапысе классик-влакын произведенийышт дене спектакльым ончыктат.
Тыгодым марий кундемыште М. Шкетан лӱмеш марий кугыжаныш драме театр Шкетан сад сценыште фильм-влакым ончыкта. 6 сентябрьыште кумылан-влак «Саликам» ончен кертыт гын, 13 сентябрьыште «Большая река» фильмым аклаш лиеш.
Ешарен кодена, лишыл жапыште марий артист-влак Москвашке каят. Тушто «Артмиграфия» фестиваль лиеш. Шкетан театр «Йыван Кырла» постановкым наҥгая. 24 сентябрьыште марий театрын сценыштыже «Майатул» финн-угор театр-влакын фестивальже тӱҥалеш. Тудым «Окса тул» спектакль дене почшаш улыт. Тудым Василий Пектеев шынден.
Комментариев: 0