Республикысе курчак театрын «Йӱд орол» спектакльже черетан фестивальыште Гран-При дене палемдалтын. Екатеринбург олаште «Великий Петрушка» тӱнямбал кӱкшытан фестиваль эртен. Республикысе курчак театрын артистше-влак Екатеринбург олаште «Йӱд орол» спектакльым ончыктеныт. Тушко элнан тӱрлӧ регионлаж гыч курчак театр-влак чумыргеныт. Тиде Ульяновск, Санкт-Петербург, Ижевск, Киров гыч коллектив-влак. Марий Эл республикысе курчак театр «Йӱд орол» этнофутуристический мистерийым кок кече ончыктен. Ешарен кодена, тиде спектакль «Золотая маска» премийлан кум номинаций дене номинант. Тыгак тиде спектакль кодшо ийын «Йошкар-Ола театральная» фестивальыште гран-при дене палемдалтын. Тиде спектакльым курчак театрын художественный вуйлатышыже, Марий Эл сымыктышын сулло деятельже Алексей Ямаев шынден. Спектакльыште марий фольклор негызеш йӱла, кызытсе пагытын ойыртемже ончыкталтыт. Екатеринбург олашке курчак театрын артистше-влак республикын 100 ийже вашеш миен коштыныт.
Комментариев: 0