Врач-влак маскым чияш да дистанцийым эскераш темлат. Тидын нерген регионысо оперативный штабын черетан заседанийыштыже ушештареныт.
Роспотребнадзорын вуйлатышыже Светлана Булатова палемден, пытартыш жапыште республикыште КОВИД-19 дене тӱшка черланымаш лийын огыл. Тидлан йочасадлаште персоналын тестированийым эртыме, пищеблоклаште санитар правилым тӱткын эскерымаш, школлаште мониторинг сай лектышым пуа. Тыге мутлан, йочасадысе 23 пашаеҥын тестированийым ыштымеке, коронавирус пеҥгыдемдалтын, иктыжынат черланымаш пале лийын огыл.
Регионысо Роспотребнадзорын палдарымыже дене, пытартыш жапыште Марий Элыште черланыше-влакын чотшо утыжым огеш ешаралт. Вес регионышто канен толшо 6 еҥын коронавирус пеҥгыдемдалтын.
Пандемий жапыште республикыште 128 тӱжем утла еҥлан тестым ыштеныт. Шошо-шыже пагытыште тӱрлӧ вирус, а тидын радамыште коронавирусат, шукемын кертеш, садланак кызыт еҥ-влаклан грипп дечын привикым ыштат. Марий Элын вуйлатыше йот элласе студент-влакын пӧртылмышт шотышто йодышым пуэн. ВУЗ-влакын вуйлатышышт тидын шотышто тыге ешареныт: йот элла дене авиасообщений уке, садланак студент-влак эше пӧртылын огытыл, но пӧртылмекышт кок арня обсерваторышто лийыт, вара вере тунемаш тӱҥалыт.
Комментариев: 0