Кычалше отряд-влак Ржев ола воктене эртарыме экспедиций годым сар жапыште колышо салтак-влакын кап-кыл ужашыштым муыныт. Нуным пужен тойымашке Марий Эл гычат делегаций миен. Колышо салтак-влак коклаште мемнан землякна Михаил Гусеват лийын. Тудо Марий АССР тунамсе эше Пектубай район гыч фронтышко 42-шо ий июньышто каен. Тидын марте увер дечын посна йомшылан шотлалтын. Кычалше-влак салтакын родо-тукымжымат муыныт. Нунылан колышо кап пелен мумо икмыняр арверым пуэныт. Нине арвер-влак ончыкыжым Какшанмучаш школын тоштержым пойдарат.
Комментариев: 0