Школ да ешартыш шинчымашым пуышо учреждений-влаклан республикын правительствыже оборудованийым ойырен. Тиде компьютер технике, лазер ден графировко дене пашам ышташ станок, турист да художественный пашалан, робототехнике дене оборудований. Чыла тидым «Образований» национальный проектын «Кажне йочан сеҥымашыже» федерал проект дене налыныт. Тидлан 20 миллион теҥге ойыралтын. Районлаште йоча-влаклан шуаралташ кружокым почыныт. Тиде «Робототехнике», «Лӱдыкшыдымылык школ», «Киностудий», «Лесничество школ». Оборудованийым кажне гаяк районышко колтеныт. Мутлан, Курыкмарий районышто «Лӱдыкшыдымылык школ» кружокышко 24 йоча кошташ тӱҥалеш, туризм виктыш дене 30 икшыве ешартыш шинчымашым налеш. Советский поселкышто 128 верым ыштеныт. Тушто «Робототехнике», «Изобразительное искусство», «Шахмат» кружокым почыныт. Тений республикыште 45 организацийыште 3000 утла верым ыштеныт. «Образований» национальный проект дене 2024 ий марте 5 гыч 18 ияш марте икшыве-влаклан ешартыш вер ситышын лийшаш. Чыла йоча гыч 80% тӱрлӧ кружоклашке коштшаш.
Комментариев: 0