Национальный проект-влак почеш чоҥымо объект-влакым тӱткын тергаш кӱлеш. Тидын нерген лӱмын погымо совещанийыште регион вуйлатыше Алекандр Евстифеев палемден. Промышленность, экономике вияҥмаш да ужалымаш министерстве тиде йодышым эре шке тӱткышыштӧ куча.
Тазалыкаралтыш министр Марина Панькова палемден: республикыште тений идалык мучаш марте 17 фельдшер-акушер пунктым чоҥышаш улыт. Нунын проектыштым ыштен шуктеныт, сентябрь мучаш марте тыгак чыла контракт ямде лийшаш. «Тазалыкаралтыш» национальный проект дене келшышын тений тыгак Йошкар-Олаште вертолет площадкым ыштен шуктат. Тидлан республикысе бюджет гыч 8 миллион теҥге ойыралтеш.
Чоҥымаш, архитектур да илымвер коммунал озанлык министр Михаил Степанов совещанийыште «Юл эҥерым тазаҥдымаш» федерал проект нерген ойлен. Тудын дене келшышын Марий Турек районысо Ноля эҥерыште да Козьмодемьянск олаште канализацийым эрыктыме сооружений-влакым ыштат.
Вашлиймаште корным ыштыме йодышымат тарватеныт. Республикысе индивидуальный вияҥмаш программе почеш Ураев лӱмеш бульвар да Петров уремыште корным ыштат. Ураев лӱмеш бульвар шотышто проект документ-влакым экспертизыш пуымо, а Петров урем шотышто иктешлымаш уло.
Совещанийыште спорт, туризм да самырык-влакын политикышт шотышто министр Лидия Батюкова «Демографий» национальный проектын кышкарыштыже улшо «Спорт- илышын нормыжо» проект нерген ойлен. Тидлан 2020 ийлан 94 миллион теҥге палемдалтын. 9 миллион теҥгем изирак спорт площадке-влакым ышташ оборудованийым налаш кучылтыныт. Тений тыгак Козьмодемьянск олаште да Юрино поселкышто стадион-влакым чоҥен пытарышаш улыт.
Вашлиймаште йочасадлаште ешартыш верым ыштыме, школым чоҥымо нергенат ойленыт. Красный Стекловар поселкыштат психоневрологий интернатын корпусшым ыштен шуктышаш улыт.
Комментариев: 0