Оршанка рӱдӧ эмлымверыште республикын рӱдӧ олаж гыч коронавирус да тудын лийын кертме дене черле пациент-влакым эмлаш тӱҥалыт. Тазалык аралымаш министерствыште журналист-влаклан брифингым эртареныт. Тушто республикыште коронавирус инфекцийын шарлымыже нерген увертареныт. 6 октябрьлан республикысе инфекционный 8 стационарлаште 712 койко-вер уло, 82% айлыме. Норматив дене резервыште 20% вер лийшаш. Садланак Медведево рӱдӧ эмлымверыште коронавирус инфекций дене черле-влаклан ешартыш 42 верым ыштат, а лишыл жапыште эше 20 верлан шукемден кертыт.
Оршанка рӱдӧ эмлымверыште Йошкар-Ола гыч коронавирусан черле-влаклан 90 верым ыштат. Пациент-влаклан экстренно республикысе клинический больнице, Йошкар-Оласе больнице да 1-ше номеран медсанчастьыште полшат.
Врач-влак чер шарлымын икмыняр амалжым палемдат. Еҥ-влак отпуск гыч пӧртылыныт, йоча-влак каникул гыч. Шыже пагытысе инфекций чер шукемеш, эшежым республикыште илыше-влак профилактике йӧным огыт эскере, маскым огыт чий. Тазалык аралымаш министр Марина Панькова республикыште илыше-влакым тазалыкым аралаш ӱжын, кидым антисептик-влак дене обрабатыватлаш, маскым да перчаткым чияш, врачын полышыжлан жапыштыже эҥерташ.
Комментариев: 0