Лишыл жапыште Марий Турек районысо Мосолов лӱмеш тоштер марий-влак кокла гыч Совет Союзын икымше геройжо Сергей Суворов нерген фильмым ыштен шукта. Шке жапыштыже видеограф Иван Иванович Герасимов тоштерышке тыгай шонымаш дене толын, тоштер пашаеҥ-влак проектым возеныт. «Марий кундемын патыр эргыже» фильмым ышташ шонымашым Тӱвыра, печать да калык-влакын пашашт шотышто министерстве сайлан шотлен. «Марий Элын кугыжаныш национальный политике» кугыжаныш программе дене тудым тений Сергей Суворовын шочмо велне Кугу Вочарма ялыште, тыгак Калуга областьыште сниматленыт.
Сеҥымашын 75-ше идалыкше да Марий Автономийын 100 ийже лӱмеш ыштыме фильмыште Марий Турек кундемыште шочшо, 19 ияш подвигым ыштыше Сергей Суворовын илышыже ончыкталтеш. Сергей Сувровын образшым Ургакш лицейын тунемшыже Дмитрий Бабайкин чоҥен, а тудын йӧратыме ӱдыржӧ Качушым - Кристина Волкова. Ешарен кодаш лиеш, Совет Союзын герожо Сергей Суворовын подвигше нерген Дмитрий Орай «Чолга шӱдыр» повестьым возен. Марий Турек Кугу Вочармаште икмыняр ий ончыч тудын лӱмеш паркым ыштеныт.
Комментариев: 0