Марий Эл Вуйлатыше Александр Евстифеев пашаче вашлиймаш дене кум районышто лийын. Эн ончыч Морко район Кужер поселкысо психоневрологий интернатым ончен лектын. Тушто 100 еҥлан келыштарыме илыме корпусым чоҥымо паша умбакыже шуйна. Пашам «Демографий» нацпроектыш пурышо «Кугырак тукым» федерал проект почеш шуктат. Чыла пашам идалык мучаш марте пытарышаш улыт.
Варажым пашаче вашлиймаш Волжский районышто шуйнен. Тушто Приволжский посёлкышто кап-кылым тазаҥдыше комплексым чоҥен пытарат. Кызыт тыште кӧргӧ отделке пашам шуктат. Чоҥышо-влак кок бассейнлан бетон негызым пыштеныт. Ушештарена, Приволжскийысе ФОК-ышто бассейн-влак, спорт да тренажёр зал-влак верланаш тӱҥалыт. Александр Евстифеев тыгак Звенигово районышто лийын. Туштат социальнын кӱлешан объектым ачалат. Тиде калыклан социал могырым полышым пуышо рӱдер. Кызытсе жаплан тудо муниципал йочасадын 1-ше да 2-шо пачашыштыже верланен. Марий Эл республикын калык илышым саемдыме шотышто министр Марина Островская палемден, рӱдер-влакым вес полатыш кусарашлан, тушто фасадым, леведышым, кӧргӧ пӧлем-влакым, кумдыкым ачалыман. Марий Эл вуйлатыше полатым ончен лектын. Тудо тиде пашам чыла жапыштыже ыштен шукташ йодын.
Комментариев: 0