Поэтесса Татьяна Пчелкинам «Светлана» премийым налме дене саламленыт. Татьянан лӱмжӧ поэзий тӱняште палыме, ты марте тудо икмыняр книгам луктын.
Тиде сылнымут конкурсым Светлана Эсауловам шарныме лӱмеш «Светлана» фонд кок ийлан ик гана эртара. Тиде премийым налше автор-влак «Светланан библиотечкыже» пале дене шке поэзий книгаштым луктыт. Ты марте тиде премийым Алена Яковлева, Раисия Сунгурова, Борис Комаров суленыт да шке книгаштым луктыныт. Уста еҥ-влакын пашаштым лӱмын чумырымо жюри акла. Сеҥышын лӱмжым «Давай на равных говорить…» поэзий касыште увертарат.
Ты гана Пет Першут, Шадт Булат, Василий Рожкин да моло марий поэт-влакын почеламутыштым лудыныт. Поэзий касыште молгунамсе семын Шкетан лӱмеш марий драме, Руш академический да Марий самырык театрын артистше-влак сылнымутым рушла да марла йоҥгалтареныт. «Давай на равных говорить…» проектын организаторжо да касын вӱдышыжӧ – Герман Пирогов.
Комментариев: 0