Куженер кундем Тошто Йӱледур ялыште илыше-влакын пӧртлашкышт «канде тул» толын. «Устойчивое развитие сельских территорий» программе почеш Шӱдымарий, Тошто Йӱледур, Йырмарий, Пургак яллашке газ пучым шупшыныт. Тидын дене пырля кӱкшӧ давлениян кок газ пучым колтеныт. Иктыже – Изи Чарнур-Йӱледур могырышко, тудын кужытшо 24 километр. Тидлан 218 миллион теҥге ойыралтын. Весыже – Портянур-Руш Шой, тудын кужытшо 22 километр, тидлан 131 милион тенге ойыралтын. Чумыр пашалан 350 миллион теҥгем палемденыт ыле. Чыла тиде паша ышталтмеке, Куженер районышто идалык мучашлан газификаций 75% шуэш. Тошто Йӱледурышто гын, тений газым 57 портышко пуртат. Таче тиде ялыште 237 еҥ ила. Тошто Йӱледур ялыште газым пайремлын чӱктеныт. Тушко регион вуйлатыше Александр Евстифеев миен. Куженер районышто лиймыже годым кундемнан ончылеҥже поселкысо рӱдо паркын реконструкцийжым аклен. Тудым эше 1964 ийыштак ыштеныт, тений уэмденыт. Паркыште «Родина-мать» монумент, локальный сарлаште вуйым пыштыше-влаклан стелла-влак, йоча площадке да каныме вер улыт. Кодшо ийын «Оласе йӧнан вер-шорым ыштымаш» федерал программе почеш реконструкций паша тӱҥалын. Ӱмаште ойырымо 4 миллион тенге дене парк кумдыкышто у печым ыштеныт, тыгак тиде верым у семын волгалтареныт. Тений пашам мучашлыме. Тушто видеоэскерымаш системе, теҥгыл, урно-влак улыт, корным олмыктеныт. Проектын чумыр акше 5 миллион тенгешке шуын.
Комментариев: 0