Марий подкогыльо да Комавел сыр «Российын тамже» регионысо бренд-влакын национальный конкурсышко темлалтыныт. Подкогыльо – финн-угор калыкын сийже, марий-влак тудым шыл, торык да паренге дене ыштат. Республикысе ик кугу предприятий таче кечын тудым производство кӱкшытыштӧ луктеш, тиде продукций «Марий Элыште ыштыме» брендымат сулен. «Комавел» сырым тыгак лӱман кундемыште ыштат, тиде сырын рецептшым предприятийын технологшо эше 2016 ийыште ыштен, тудым ушкал да вӱльӧ шӧр гыч ыштат. Марий Эл гыч «Российын тамже» национальный брендше-влак конкурсышто тыгак пакчасаскам, сырым, мороженийым, мармеладым, мӱйым темленыт.
Комментариев: 0