Тиде спорт комплексым эше икмыняр ий ончыч нӧлташ тӱҥалыныт, но тӱрлӧ амаллан кӧра, пашам шогалтеныт. Регион вуйлатышын тыршымыже дене, тений июнь тылзыште физкультур-спорт комплексыште паша тарванен. Ты марте тушто оралте веле лийын. Ынде бассейн, спортивный да тренажер зал, тыгак вес зал-влакат улыт. Республикын 100 ийжылан Волжский районышто илыше-влаклан сай пӧлек. Чоҥен шуктымеке, ФОК-ышто пашам ышташ кумылан-влакым кычалыт, директор, тӱҥ инженер, тренер-влак кӱлыт. Марий Элын вуйлатышыже Александр Евстифеев спорт комплексыште лийын, тушто ыштыме пашам аклен. Физкультур-тазаҥдыме комплекс воктене ончыкыжымат тӱзатыме пашам шукташ тӱҥалыт, тудын воктене хоккей коробкам ышташ темленыт.
Комментариев: 0