Марий Элыште ковид-стационарлаште медик-влаклан ординатор да студент-влак полшат. Таче кечын инфекционный отделенийлаште пашам ыштыше врач-влаклан полшаш 66 еҥ толын. Тиде медицин ВУЗ-лаште шинчымашым погышо, ординатор, Йошкар-Оласе медицин колледжын тунемшышт. Регионысо тазалыкаралтыш министерстве палдара: самырык кадр-влак пашам ыштат але практикыште улыт, тыгак волонтер семын тыршат. Студент-влак вес регионла гычат толыт, Казанский, Кировский, Чувашийысе кугыжаныш медуниверситетла гыч. Тиде кечылаште больницылашке Марий Кугыжаныш университетын 35 студентше ушнышаш.
Пытартыш данныйым ончалаш гын, республикыште 51 еҥын коронавирус пеҥгыдемдалтын. Инфекционный стационарлаште 1188 еҥ эмлалтеш, 39 еҥ ИВЛ аппаратыште.
Роспотребнадзорын республикысе виктемже 21 ноябрь гыч коронавирус инфекцийлан тестым ыштыме да тудын иктешлымашыжым налме дене кылдалтше «шокшо линийым» увертарен. Анализым кужу жап ямдылыме йодышым еҥ-влак кажне кечын 9 гыч 18 шагат марте пуэн кертыт. Номер – 8 8362 68-19-44.
Комментариев: 0