Йошкар-Олаште шарнымаш да чап идалыкым иктешленыт, оборонно-массовый да сарзе-патриотизм паша шотышто тылзым почыныт. Йӱла почеш, тушко сарзе клуб-влакын еҥышт, кадет классын тунемшышт, юнармеец-влак погыненыт. Пайремле мероприятийыште палемденыт: пандемийым ончыде, Марий Элыште шарнымаш да чап идалыкым сай кӱкшытыштӧ эртареныт. 2020 ийыште шуко мероприятий волонтёр, самырык тукымым сарзе-патриотизм шӱлышеш куштышо рӱдер, кычалше отряд-влакын еҥыштлан кӧра илышыш пурталтын. Тиде – шарнымаш сорта, курымашлык полк, Сеҥымаш окна да моло акций-влак. Ойыртемалтше-влаклан пӧлекым, дипломым кучыктеныт.
Шарнымаш да чап идалык мучашлалтын гынат, слет ден проект-влак умбакыжат эртаралтыт. 26 январьыште почылтшо оборонно-массовый да сарзе-патриотизм паша шотышто месячник 23 февраль марте шуйна. Тений тудо: полководец Александр Невскийын шочмыжлан 800 ий, Российысе тистым пенгыдемдымылан 30 ий, совет айдемын космосыш чонештмыжлан 60 ий да молыланат пӧлеклалтын. План почеш, ик тылзе жапыште 80 тӱжем утла самырык ен тӱрлӧ мероприятийыште шке вийжым ончыкта.
Комментариев: 0