Йошкар-Олаште марий филармонийын полатшым чоҥен шуктат. Март тылзыште пашаеҥ-влак сцене оборудованийын конструкцийже-влакым ышташ тӱҥалыныт. Тидын нерген регион вуйлатышылан тӱвыра министр Константин Иванов увертарен. Апрельыште зданийын фасадшым, майыште полатышке пурымо верым ыштат. Июньышто кумдыкым тӱзатышаш улыт. Тидын шотышто чыла контракт-влакым пеҥгыдемдыме. Марий кугыжаныш филармонийын зданийжым республике бюджет кӱшеш 2014 ий гыч чоҥаш тӱҥалыныт. Но окса чӱдылан кӧра, пашам жаплан шогалтеныт ыле. 2019 ийыште кужун чоҥымо объектым «Культура» нацпроектышке пуртеныт, объектын реновацийжылан республикылан 317 миллион тенге ойыралтын. Зданийым тений ыштен шуктышаш улыт.
Вашлиймаште Москваште эртаралтшаш-республикын 100 ияш лӱмгечыжлан пӧлеклалтше концерт нергенат ойленыт. Пандемийлан кӧра, программым кок гана кусараш логалын. Кызыт кечым палемдыме – тиде 25 июнь.
Константин Иванов регион вуйлатышылан Эрик Сапаев лӱмеш академический опер да балет театрын 4 гыч 9 февральыште Дубайыште эртыше гастрольжо нергенат ойлен. Республисе театрым моткоч чот шокшын вашлийыныт. Артист-влак икмыняр спектакльым ончыктеныт. Кызыт театр руш балерина Галина Уланова лӱмеш фестивальлан ямдылалтеш. Тудо 9 апрельыште «Анюта» постановкын премьерыже дене почылтеш.
Моло театр-влак тиде кечылаште районлашке гастроль дене лектын коштыт.
25 мартыште тӱвыра пашаеҥ-влакын профессионал пайремыштым палемдат. Тудлан пӧлеклалтше погынымаш Опер да балет театрыште лиеш.
Комментариев: 0