Пандемий жапыште регионышто вирусым чактарымаште тыршыше-влакын пашашт нерген Марий Эл Общественный палатын заседанийыштыже ойленыт. Регион вуйлатыше Александр Евстифеев палемден: ий гыч ийышке мер организаций-влак регионын вияҥмашыже шотышто кӱлешан йодыш-влакым рашемдымаште утларак полшат. Коронавирус инфекцийын шарлымыже чыла службо да структуро-влакым терген. Кучем дене пырля тиде черым волонтер, мер ушем, тыглай еҥ-влак шижтараш да сеҥаш полшеныт. Таче пандемий шагалемаш тӱҥалын, тыгодым тӱшка иммунитетым пеҥгыдемдаш вакцинаций полша. Регион вуйлатыше ешарен, пандемий жапыштат Марий Элыште национальный проект-влак дене паша ик кечыланат шогалын огыл. Кодшо ийын регионышто ныл у йочасад, Йошкар-Олаште у школым нӧлтеныт. Чоҥышо-влак илымверым план дечын шуко ыштеныт. Корным саемдыме нерген ойлаш гын, ӱмаште 170 километр корным тӧрленыт, тиде план дечын 30 километрлан шукырак. Регионышто социал-экономике вияҥмаш шотышто индивидуальный программе илышышке пура, пытартыш жаплан икымше гана 200 миллион теҥгелан 98 единице специализироватлыме коммунальный техникым налыныт. Тенийысе паша нерген ойлаш гын, идалык мучаш марте перинатал рӱдерым, Эшпай лӱмеш марий филармонийын полатшым, Медведево поселкышто школым, ныл йочасадым чоҥен шуктышаш да моло проектымат илышышке пуртышаш улыт.
Комментариев: 0