Марий Элыште «Юнармийын самырык корреспондент-влакын школышт» лиеш. Тиде проектым шыҥдарыме йодышым Йошкар-Олаште «Парк Патриот Медиа» автономный коммерческий огыл организаций дене пырля каҥашеныт. Самырык журналист-влакын тыгай школышт икмыняр регионышто пашам ыштат. Юнармеец-влак вӱдышӧ, продюсер, оператор , тыгак монтажер профессийым лишкырак пален налыт. Лишыл жапыште проект Марий Элыштат тӱҥалтышым налеш. Тудлан верым самырык-влакын полатыштыже ойырат, Аудиторий-влакым палемденыт, нуным тӧрлаш кӱлеш. Лишыл жапыште проект дене пашам ыштыше командым чумырат.
Ушештарена, Российыште «Юнармий» толкын 2016 ий 28 май гыч илышышке пура. Тудын инициаторжо – обороно министр Сергей Шойгу. 5 ий ончыч 1 июльышто мемнан республикыштат юнармеец-влакын пӧлкашт ышталтын. Толкынын тӱҥ шонымашыже - самырык-влакым патриот шӱлышеш кушташ да сарзе паша дене тӱҥалтыш шинчымашым пуаш.
Комментариев: 0