Козьмодемьянск оласе йоча художественный школлан 100 ий. Таче школышто 100 утла усталык шӱлышан самырык еҥ шинчымашым пога. Шке жапыштыже Козьмодемьянск олаште художественный школым почмаште Марий сӱретче-влак кокла гыч иктыже Александр Григорьев тыршен. Школым почмо дечын вара, ик курым эртен гынат, тиде школ ятыр икшывым кугу тӱняшке лукташ полшен, онгчыкылык сӱретче-влак тиде школышто шинчымашым погеныт. Козьмодемьянск оласе художественный школым регион вуйлатыше Александр Евстифеев салам мутым колтен.  

 Республикыште идалык мучаш марте 17 ФАП-ым ыштен шуктышаш улыт. «Тазалыкаралтыш» нацпроектын «Икымше медицин-полышым вияҥдыме системе» регионысо проект дене яллаште фельдшер-акушер пунктым чоҥаш 14 кугыжаныш контрактым пеҥгыдемдыме. Таче кечын куд районышто 9 объектым ыштат. 

Марий Элыште 2019 ийлан еҥ-влакын погыштлан налогым тӱлымаш уведомленийым колтат. Транспорт, мланде, илымверлан налогым 1 декабрь марте тӱлен шукташ кӱлеш. Налог службо 300 тӱжем утла уведомленийым ямдылен. Налогым тулышӧ-влак гыч нылымше ужашыже уведомленийым электрон йӧн дене – налогым тӱлышын личный кабинетыште налыт. Кӧн тыгайже уке, уведомлений, ончычсо семын почта гоч серыш семын толыт. 

Идалык мучаш марте республикыште 500 утла еҥлан коронавирус дечын привикым шындат. Россий тазалыкаралтыш министерстве да Республик Правительстве коклаште пенгыдемдыме келшымаш дене, Марий Элыш 42 дозо вакцине толын, нуным Волжск оласе больницын 42 медицин пашаеҥыштлан шындыме. 

Коронавирус инфекцийым шижтараш да черланыше-влакым эмлаш Республике Правительстве ешарен 20 млн теҥгем ойыра. Марий Элын вуйлатышыже Александр Евстифеев распоряженийышке кидпалыжым пыштен. Тудын дене келшышын, эмлымверлаште ешартыш койко-верым ышташ, тыгак медицингаз- кислородым ситараш оксам ойырат. Тидын дене пырля медпашаеҥ-влаклан аралтыш средствым налыт.

Статистикым ончалаш гын, кугарнян республикыште 35 еҥын коронавирус пеҥгыдемдалтын, черланыше-влакын чотышт 5000 эртен, стационарлаште 650 утла еҥ эмлалтеш.

Марий Элыште ойыртемалтше пӱртӱс объектлаште пале – знак-влакым шынденыт. Кызыт тиде 8 вер. Тидын нерген регионысо пӱртӱс ресурс министерстве увертара. Инфо-щит, аншлаг-влакым республике кӱкшытан пӱртус памятник чекыште шынденыт, тыгак «Моркинский» заказникым, да шукерте огыл ышталтше «Пошкит Куп» пӱртус памятник-влакым  палемденыт. Марий Элыште таче кечын 10 кугыжаныш пӱртӱс заказник, республике кӱкшытан 10 пӱртус памятник уло. 

Ир янлык-влаклан кӧра лийше корно туткар-влак шукемыт. Сентябрь тылзыште республикыште 15 тыгай азап лийын. Эн шукыжо 7 гыч 9 шагат кас марте. Тыге мутлан, кодшо кечылаште корно туткарышке 23 ияш самырык еҥ логалын. Чыла тидым шотышко налын, кугыжаныш автоинспекций машинам виктарыше-влаклан тӱткӧ лияш темла. «Ир янлык» корно палым ужыда гын, эркынрак кудалза. Янлыкым тӱкен каен улыда гын, Пӱртӱс ресурс министерствышке але районысо инспекторлан йыҥгыртыза. 

Чодыралаште тений кеҥежым 35 пожар лийын. Тышечын 31 чодыра фондын кумдыкыштыжо, оборна да лӱдыкшыдымылык мландыште 2, федерал кӱкшытан верыште 2 тулазап лийын. Тул 20 гектар ужар кумдыкым авалтен. Тулын ылыжме тӱҥ амал-еҥ-влакын титакышт. 35 тулазап гыч 32-жо айдемын титакшым палемдат. Кукшо игече озаланыме жапыште,   тулым эскерен кучылтман. Чодыра пожарым шекланен шуктымеке, Пӱртӱс ресурс министерствын диспетчер службышкыжо йынгыртман: (8362) 56-65-35, але Чодра охранын вияш линийышкыже 8-800-100-94-00.

Маристат палдара: 2019 ийыште республикыште 2144 врач пашам ыштен, тышечын терапий профиль дене 553 еҥ, хирургий дене 224, 129 акушер-гинеколог, 246 педиатр, 53 офтальмолог, 95 невролог, 180 стоматолог, рентгенолог да радиолог-влакын чотышт 82-ыш шуэш. Кодшо ий дене таҥастарымаште тений стоматолог, терапевт, хирург-влакын чотышт шукемын, а теве педиатр, гинеколог да невролог-влак шагалемыныт. Кодшо ийын Республикыште илыше 10 тӱжем еҥлан шотлымаште 32 врач лийын. Ӱмаште республикысе ВУЗлаште «Лечебное дело» специальность дене 1452 студент тунемын, «Педиатрий» специальность дене 65 еҥ шинчымашым налын. 

Йошкар-Олаште илыше-влак маскым чийыме режимым пудыртышо–влак шотышто вуйым шийыт. Шокшо линийышке 47 йодмаш пурен. Тушто ужалыме да услуго сферыште маскым чийыме режимым пудыртымо нерген ойленыт. Оласе администрацийыште увертарат. Чыла вуйшиймашым кӱлеш органлаште ончат. Шокшо линий йынгыр-влакым налеш. Телефон номерым те экраныште ужыда.