Марий Эл Радио

Республикысе сӱретсымыктыш тоштерын фондшо 40 радыналан пойдаралтын

  • Дата: 14:03, 24-08-2020
  • Просмотров: 535

Республикысе сӱретсымыктыш тоштерын фондшо 40 радыналан пойдаралтын. Нине паша-влакым республикыште эртыше российысе этнофутурист пленэр жапыште сӱретче-влак ыштеныт. 11 кече жапыште 14 профессионал марий кундем дене палыме лийыныт. Республикышке Татарстан, Удмуртий, Нижегородский, Тюменский, Пензенский областьла, Санкт-Петербург гыч уна-влак толыныт. 


Марий Эл Радио

Россий мучко турист семын коштмылан пытарыме оксам пӧртылташ тӱҥалыт

  • Дата: 13:59, 24-08-2020
  • Просмотров: 493

21 август гыч Россий мучко турист семын коштмылан пытарыме оксам пӧртылташ тӱҥалыт, но тӱрысшак огыл.

Кеч-могай турым лач ты кече гыч тӱҥалын 28 август марте налаш лиеш. А тидлан sale.russia.travel але мирпутешествий.рф сайтыш пурен, туроператор ден унагудо-влакын темлыме 700 тур гыч (нуно чыланат программыш ушненыт) келшышыжым ойырен налаш йӧн уло. Оксам «МИР» карте дене тӱлыман. А 5 кече жапыште вара тудын акшым процент шот дене пӧртылтат. Тудын кугытшо ойырен налме тур але унагудышто илыме ак дене кылдалтын. Мутлан, 25 тӱжем теҥге гыч 49 тӱжем теҥге марте налыда гын, 5 тӱжем теҥгем, 50 тӱжем теҥге гыч 74 тӱжем теҥге марте — 10 тӱжем теҥгем, 75 тӱжем теҥге деч шергыраклан 15 тӱжем теҥгем пӧртылтен кертыда.

Тыгодым икмыняр условийым шотыш налман.


Марий Эл Радио

Йочасад-влак шке паша радамышт деке пӧртылыт

  • Дата: 13:57, 24-08-2020
  • Просмотров: 453

Йочасад-влак шке паша радамышт деке пӧртылыт. Роспотребнадзор палдара, эрдене икшыве-влак «фильтр» гоч эртат, нунын температурыштым висат. Йочан ОРВИ пале лиеш гын, ача-ава толмешке, тудым моло икшыве дечын посна пӧлемышке колтат. Йочасадлаште кажне кечын дезинфицирующий средство дене эрыктышаш улыт, столовый да пищеблоклаште персонал маске да перчатке дене пашам ышташ тӱҥалыт. 


Марий Эл Радио

Марий Эл гыч еш-влак «Идалыкын ешыже» Российысе конкурсышто сеҥыше радамышке лектыныт

  • Дата: 13:54, 24-08-2020
  • Просмотров: 512

Марий Эл гыч еш-влак «Идалыкын ешыже» Российысе конкурсышто сеҥыше радамышке лектыныт. Федерал этапышке Российын 83 субъектше гыч 342 йодмаш пурен. Еш-влакым вич номинаций дене акленыт. Шернур район Шокшем ял гыч Малининмыт «Ялысе еш» номинацийыште сеҥеныт. 


Марий Эл Радио

Марий Элын вуйлатышыже 5-ше номеран школышто лийын

  • Дата: 13:52, 24-08-2020
  • Просмотров: 367

Марий Элын вуйлатышыже 5-ше номеран школышто лийын, тушто тунемме верын кокымшо черетшым ыштен пытарат. Корпус 336 еҥлан ышталтеш, тушто тунемме класс, тыгак спортзал, актовый зал да библиотеке лийыт.  Школым 10 ий чоҥат, икымше черетым пашашке колтеныт, кокымшым ыштен пытарат. Сентябрь мучаш марте тудо ямде лийшаш. 


Марий Эл Радио

Александр Евстифеев Волжск олашке миен

  • Дата: 13:51, 24-08-2020
  • Просмотров: 467

Александр Евстифеев Волжск олашке миен. Ончыч тудо Чапаев уремыште коллекторын аварийный вержым ончалын.  Кок арня ончыч Республике правительствын резерв фондшо гыч тудым ачалаш 8 млн теҥгем ойыреныт. А.Евстифеев ачалыме пашам шуктымо дене палыме лийын. 


Марий Эл Радио

Оршанка районышто очистной сооруженийым чоҥат

  • Дата: 13:50, 24-08-2020
  • Просмотров: 520

Оршанка районышто очистной сооруженийым чоҥат. Тиде пашам республикысе адресный инвестиционный программе дене шуктат. Кок объектым ыштат. Оршанка район Изи Каракша ялыште очистной канализационный сооруженийым ыштеныт. Тудо шукертак кӱлеш. Ик суткаште 20 кубометр вӱдым эрыкта. У объектым тений кеҥежым ыштен шуктеныт.


Марий Эл Радио

Роспотребнадзор виктем йоча сатун качестве шотышто шокшо линийым эртара

  • Дата: 13:47, 24-08-2020
  • Просмотров: 400

У тунемме ий вашеш Роспотребнадзор виктем йоча сатун качестве шотышто шокшо линийым эртара. 2 сентябрь марте специалист-влак школлан кӱлешан сату, йоча-влаклан сатун качестве шотышто вашештат. 68-19-44, 8-800-707-61-77, районлаште Роспотребнадзорын пӧлкалашкыже йыҥгырташ лиеш. 


Марий Эл Радио

Йошкар-Олаште корным тӧрлат

  • Дата: 13:46, 24-08-2020
  • Просмотров: 537

Йошкар-Олаште «Лӱдыкшыдымӧ да сай качестван автомашина корно» национальный проект дене корным тӧрлат. Рӱдоласе администрацийын уверже дене, Дружба уремыште асфальтын кӱшыл лончыжым пыштеныт. Подряд пашам шуктышо организаций корно воктенсе тротуарым, остановко верым ышта, тыгак корно воктенсе шудым ӱдат да корно палым ыштат. Муниципал контракт дене пашам сентябрь мучаш марте ыштен шуктышаш улыт. 


Марий Эл Радио

1 сентябрьыште кевытлаште аракам ужалаш огыт тӱҥал

  • Дата: 13:41, 24-08-2020
  • Просмотров: 379

1 сентябрьыште кевытлаште аракам ужалаш огыт тӱҥал. Республикысе закон дене келшышын, йоча да самырык-влакын пайрем кечын пеҥгыде йӱышым огыт ужале. Тидын нерген промышленность, экономике вияҥмаш да ужалымаш министерстве ушештара. Закон дене келшышын, шинчымаш кечын кевытлаште аракам огыт ужале. Тиде кӱштымашым пудыртышо-влаклан штраф палемдалтеш.