Регионыштына «Экологий» нацпроектлан кугу тӱткыш ойыралтеш. Пеҥгыде шӱк-куштырам погымо да утилизацийыш колтымо шотышто йодышым Правительствыште каҥашеныт. Совещанийым Александр Евстифеев эртарен. Куштырам погымо вер-влак республикыштына ешаралтшаш улыт.
Российыште поро йӱлаш пурышо «Ёлка желаний» У ий акций тӱҥалын. Йӱштӧ Кугызалан серышым возен, шонымашкат шуаш лиеш. Йодмашым акцийын сайтыштыже 11 декабрь марте коден шуктыман. Акцийышке тулык да ача-ава полыш деч посна кодшо, начаррак тазалыкан 3 гыч 17 ияш марте йоча-влак, изи парышан ешлаште илыше икшыве да начар тазалыкан 60 ияш деч кугурак еҥ-влак ушнен кертыт. Шонымашым шуктышо еҥ семын кажныже шке кумылжым ончыктен кертеш. Тидлан сайтыш пурен келшыше серышым ойырен, озажлан пӧлекым колтыман. Тыгак пӧлекым погышо пункт-влакым тӱрлӧ организаций пелен почмо. Тиде поро паша 2 декабрь гыч 28 февраль марте каяш тӱҥалеш.
Марий Элыште интеллектуальный модмаш эртен. Тушто уста еҥ-влак Российыште илыше калык-шамычын историйышт да тӱвырашт дене кылдалтше йодышлан вашмутым кычалыныт. Мари, руш, армян, татар да моло наций сеҥымаш верч огыл, а келшымаш лӱмеш таҥасеныт. Модмашын организаторжо – Республикысе марий тӱвыра рӱдер да Российысе марий-влакын федерал национал-тӱвыра автономийышт.
Йошкар-Олаште корнылан мутым кучышо подряд организаций-влак сутка мучко пашам ыштыме режимыш куснышаш улыт. Кызыт тӱн шотышто уремым жапыштыже эрыктен шуктымо йодыш нӧлталалтеш. Телым пашам ыштыше технике ямде. 90 лумэрыктыше транспорт да лумым поген лукташ 10 самосвал уло. Лум шуко лумаш тӱналеш гын, вес организацийла гычат спецтехникым жаплан айлаш кутырен келшыме. Тидын нерген мэрийыште увертарат. Корно кумдыкыш да тротуарыш шаваш 15 тӱжем тонн ошма-шинчал вартышым да 500 тон галитым ямдылыме.
Марий Элыште илыше-влак «Пушкинский картыште» улшо окса дене 20 декабрь марте пайдаланен шуктышаш улыт, тидын дечын вара тушто окса йомеш, вес ийын счетышко 5 тӱжем теҥге дене пыштат. Республикыште ты программышке 39 тӱвыра учреждений ушнен – театр, тоштер, филармоний, тӱвыра пӧрт-влак. Нуно 300 утла мероприятийым темлат. Пушкинский картым налаш, 14 гыч 22 ияш марте самырык-влак «Госуслуги» порталыште регистрацийым эртышаш да «Госуслуги.Культура» приложенийым телефонышко вераҥдышаш улыт.
Регион вуйлатыше Александр Евстифеев Марий Элыште Россий МСЧ-н начальникше Виктор Шангин дене вашлийын. У вуйлатыше тений 1 ноябрь гыч Россий Президентын Указше дене должностьышто службым эрташ тӱҥалын. Виктор Шангин 1975 ийыште шочын, Иваново оласе пожарно-технический училищым тунемын пытарен, Уральский кугыжаныш академийыште шинчымашыжым келгемден. Пытартыш жапыште Россий МЧС-н Санкт-Петербургысо университетын начальникын алмаштышыже лийын. Ты марте республикыште начальниклан ыштыше генерал-майор Александр Малкин сулен налме канышышке лектын.
Козьмодемьянск оласе «Паллада» лӱман Парус клублан 10 ий. Тиде жапыште клубын воспитанникше-влак учебный судно дене ятыр вере лийыныт. Эсогыл Шем теҥыз да Тихий океан мартеат миен шуыныт. Эртыме маршрутын чумыр корныжым ончалаш гын, 30 тӱжем утла морской мильыш шуэш.
Тений идалык мучко пожарный-влак 96 еҥым утареныт. Чылаже тулйылме 1360 вере озаланен. Тидыже кодшо ий дене таҥастарымаше 21% шукырак. Тул азапыште 52 еҥын ӱмыржӧ лугыч лийын. Нунын коклаште – 2 йоча. Статистике почеш, пожарыште шукыжо пӧръен колен. Икмынярынже йӱшӧ улмыштлан кӧра, утаралт кертын огытыл. Пожар службо пашаеҥ-влак тулым эскерен кучылташ темлат. Поснак йоча-влакым шкетым ида кодо. Удан пашам ыштыше электроприбор-влак дене ида пайдалане.
«Умный город» муниципал проект почеш рӱдӧ ола уремыштына 100 утла видеокамерым вераҥденыт. Ола администрацийын советникше Андрей Таников палемден, нине камер-влак криминал ситуаций, вандализм, корно туткарым жапыштыже рашемдаш полшен кертыт. 50 утла видеокамерым парк да пычкемышрак верлашке шынденыт. Идалык мучаш марте видеокамер-влакын пашаштым иктешлен, шымлымашым эртарат да кӱлеш верыш эше шындаш тӱҥалыт.
Кундемыштына 31 школышто шинчымашым погышо-влак «Билет в будущее» проектышке ушнат. Республикыште тидлан 13 площадке уло: Йошкар-Ола, Волжск, Козьмодемьянск, Оршанка да Медведево поселкылаште. Тунемше-влак 44 профессий дене шинчымашым утларак пален налын кертыт..
