Ветеринарий комитет орымаш чер дечын прививкым 1500 утла пий да 500 утла пырыслан шынден. Кодшо кечылаште тиде ведомство Россельхознадзор виктем дене пырля совещанийым эртарен. Тушто орымаш чер нерген мутланеныт. Тений икымше квартАлыште 9 тӱжем утла тӱкан шолдыра вольык, 2 тӱжем утла изи вольык, 35 имне, 1552 пий да 524 пырыслан прививкым шынденыт. 

Кажне ийын 100 тӱжем дозо вакциным чодыралашке оптат. Ешарен кодаш лиеш, 2021 ийыште республикыште орымаш чер вашлиялтын огыл. 

Республикысе озанлык-влак кокияшым да шукияш шудым тырмалат. Ялозанлык министерстве тидын шотышто озанлыкын пасуштыжо совещанийым эртарен. Тачысе кечын 4 тӱжем тонн нӧшмым ӱдаш ямдылен аяртеныт, тиде - план дечын 28 процент, тыгак кокияшлан 1 гектарыште ӱяҥдышым пуэныт, тиде план дечын 3 процент, тыгак озанлык-влак шукияш шудым тырмалат да нурышко лекташ   келшыше игечым вучат. 

Россий Президент кугу тӱткышым здравоохраненийын вияҥмыжлан, демографийым саемдымылан ойырен. Республикыште тиде паша шукталтеш, тений перинатальный рӱдерым чоҥат, тудым вес ийын ыштен шуктышаш улыт, Волжскышто азам ыштыме отделений лиеш, поликлинике-влак «аныклыме» радамышке куснат. Марий Элыште школ да йочасад-влакым нӧлтат.

Марий Эл вуйлатыше Александр Евстифеев Россий Президент Владимир Путинын посланийже шотышто комментарийым пуэн. Президент шке ойыштыжо Российын да тудын субъектше-влакын вияҥмашыже нерген ойлен. Калыклан социал полышым ойырымо, здравоохранений, образований, предпринимательство сферын пашам ыштымыже нерген палемден. 

Йошкар-Оласе урем-влакым теле дечын вара эрыктат да тӧрлат. 9 майлан ямдылалтме, тыгак кумдык-влакым тӱзатыме нерген Александр Евстифеев мэр Евгений Маслов дене мутланен. Олан вуйлатышыже ешарен: теле тений коммунал службо-влаклан неле лийын, лум шуко лумын, технике пашам эре ыштеныт, тыгодым коммунал службо-влак чыла гаяк жапыштыже пашам шуктен огытыл, тидын годым пӧртвиктарыше компаният, еҥ-влакат полшеныт.

Май мучаш марте республикыште коронавирус инфекцийым чарыме шотышто посна ямде улмо режимым шуйымо. Тидын нерген республикысе оперативный штабын заседанийыштыже пале лийын. Тудым Александр Евстифеев эртарен. Тӱшка мероприятий-влак республикыште эртаралташ огыт тӱҥал, тыгодым тиде чарымашке сеҥымашын 76-шо идалыкшылан пӧлеклалтше мероприятий-влак огыт логал, нуно республикыште план дене эртат. Указышке пуртымо вашталтыш дене келшышын, кафе, бар да ресторан-влак йудшӧ-кечыже пашам ыштен кертыт. Специальный реестрышке пуртымо лагерь-влак икшыве-влакым вашлийын сеҥат. Тыгодым еҥ-влак маскым чийышаш да социал дистанцийым эскерышаш улыт. 

Икымше гана Марий Эл эстетический гимнастике дене Юл кундемысе федерал округын чемпионат да первенствыжым вашлийын, тыгак «Красный город» турнир лийын. Таҥасымаш «Дружба» стадионын теннис кортыштыжо эртен. Йошкар-Олашке Татарстан, Башкортостан, Удмуртий республикыла, Саратовский, Самарский, Пенезенский, Нижегородский областьла да Пермский край гыч команде-влак толыныт. Марий Элын чапшым кок команде арален: «Олимп» спорт полат да Медведево спорт школ. 

Тарханово микрорайонышто у эко-паркым ыштат. Тӱзатышаш кундемын концепций конкурсышто сеҥыше-влакым палемденыт. Заказчиклан Марий Эл гыч кугу инвестор шотлалтын. Конкурсышко 87 проект пурен, нунын гыч 80-жым конкурсын тӱҥ програмышкыже ушымо. Проект-влак турлӧ лийыныт, спорт кумдык гыч тӱҥалын, дендрарий марте. Паша-влакым Марий Эл гыч веле огыл, тыгак Гермарий, Иран, Швеций да моло регионла гыч колтеныт. Финалышке индеш паша лектын. Эн сай проектлан Йошкар-ола гыч архитектур дизайн шотлалтын. Архитектор Константин Карпов палемден: Тарханово чодыраште тудо шуко гана лийын, инфраструктурым саемдыме нерген шонен, да шонымашым проектышке пыштен.

Йошкар-Олаште Свердлов уремыште корным тӧрлат. Сеҥымаш кече вашеш Ленин лӱмеш тӱвыра полат воктенсе корно оҥго гыч Анциферов урем марте лакылам петыркалат, у асфальтым шарат. Тиде урем Сеҥымаш парк воктене эрта, садланак пашам лишыл жапыште мучашлышаш улыт. Олаште урем-влакым шуко вере тӧрлаш палемдыме. Тидлан 18 тӱжем тонн асфальт-бетон вартышым кучылтыт. 

Яллаште илыше-влаклан медицин полышым саемдаш куснылшо 11 медицин коплексым налыныт. Тидын радамыште 7-ше - вер гыч верышке кусараш лийше кабинет,  тыгак 3 комплексым цифровой флюрограф, рентгеновский маммограф дене пойдарыме. Нуно график дене келшышын республикысе изи яллашке лектыт.

 2020, 2021 ийлаште чоҥымо фельдшер-акушер пункт-влак медицин пашам шукташ лицензированийым мучашлат. 2020 ийыште федерал бюджет кӱшеш 16 ФАП-ым чоҥеныт, эше иктым тений ыштен шуктеныт. Республикысе бюджет гыч ФАП-влакым пойдараш 20 миллион теҥге ойыралтын.