Республикысе озанлык-влак шошо ага пашам тӱҥалыныт. Ик эн ончыч Медведево район гыч мланде пашаеҥ-влак пасулаште 100 гектарыште кокияшым ӱяҥденыт. Тидын нерген республикысе ялозанлык министерстве палдара. У Торъял, Волжский, Медведево, Параньга озанлык-влак нӧшмым ямдылаш тӱҥалыныт-протравливанийым ыштат.
Марий Элышке «Гам-КОВИД-Вак» вакцинын черетан партийжым конденыт. Препаратын 4200 дозыжым республикысе эмлымвер ден поликлиникылашке колтат. Еҥын илышыжлан кугу лӱдыкшым кондышо вирус деч прививкым ышташ кече еда куштылгырак лиеш. Вакциным прописке почеш поликлиникыште веле огыл, мобильный пунктышто шындаш лиеш.
Марий Элыште первичный медицин полыш системым саемдаш тений 29 миллион теҥге ойыралтеш. Оксам «Тазалыкаралтыш» национальный проект дене келшышын палемдат. Тидым мер-политик рӱдерыште Общественный палатын социал йодыш шотышто комиссийын заседанийыштыже каҥашеныт. Тазалык аралтышын первичный звенон вияҥмыже шотышто икмыняр задачым шуктыман. Тиде – геоинформационный системе да технологийым вияндымаш, тыгак калыклан медицин полышым йӧнанракым ыштымаш, врач деке приемышко да диспансеризацийышке возалтмашым куштылемдаш. Тидын дене пырля фельдшер-акушер пункт-влакым чоҥаш да тӧрлаш тӱҥалыт, санитар авиацийлан окса ойыралтеш. Вашлиймаште Общественный палатын еҥышт коронавирусым эмлыше медицин пашаеҥ-влаклан тауштеныт.
Марий Элыште икмыняр ий жапыште шӱкым сортироватлыше 4 комплексым чоҥен шуктат. Иктыжым-Козьмодемьянскыште тений пашашке колтышаш улыт. «Экологий» национальный проект, тыгак пеҥгыде коммунал шӱкым перерабатыватлыме нерген регион вуйлатыше Александр Евстифеев пӱртӱс ресурс министр Алексей Киселев дене вашлиймаште каҥашен. Шӱкым перерабатыватлыше комплекс-влакым Морко, Шернур районлаште, тыгак Йошкар-Олаште ыштышаш улыт.
Йошкар-Олаште самодеятельный коллектив-влакын «Каскад» фестиваль-лабораторийын финалже лиеш. Тудо 26-29-ше апрельыште эрта. Спектакль-влакым Марий Самырык театрын, Медведевысе каныме рӱдерын, Сеҥымашын кумлымшо идалыкше лӱмеш тӱвыра полатын сценыштышт ончаш лиеш. Калык ончыко 11 спектакльым луктыт. Жюри Советский, Куженер, Медведево, Морко, Курыкмарий, Параньга, Волжский районла да Йошкар-Ола ден Волжск гыч усталык коллектив-влакын пашаштым акла.
Самырык сӱретче-влакын пашашт Сеҥымаш Тоштерын онлайн-выставкыштыже ончыкталтыт. Российысе конкурсышко тӱрлӧ регионла гыч йоча-влакын пашашт пуреныт. Икшыве-влак сарын геройжо, шке родо-тукымыштым, кундемын шочшыштым сӱретленыт. 24 апрель марте чыла кумылан-влак эн ойыртемлтше сӱрет-влак верч йӱклен кертыт. Сеҥыше-влакым икмыняр ийготан-влак тӱшкаште ойырат, а нунын пашашт почто открытке-влакым сылнештараш тӱҥалыт.
Кукшо шудым йӱлалалташ огеш лий. 20 апрель марте республикыште пожар лӱдыкшыдымылыкым эскерыме шотышто посна режим. Тидын нерген МЧС ушештара. Тиде жапыште пожар лӱдыкшыдымылык правилым пудыртышо-влаклан 400 тӱжем теҥге марте шрафым пуэн кертыт. МЧС ушештара: тулотым ылыжташ, кукшо шудым йӱлалалташ огеш лий, тыгак пӧрт да оралте воктенен шӱк-куштырам жапыштыже эрыктыман.
Сеҥымаш кече вашеш 27 апрель гыч Йошкар-Олаште Воин Чап монумент воктене почетан караул шогаш тӱҥалеш. Тидын нерген спорт да туризм министерстве увертара. 10 май марте кадет, юнармеец, сарзе-патриот клуб да кычалше отряд-влакын еҥышт курымашлык тул воктене вахтым кучаш тӱҥалыт. Тиде акций кажне ийын эрта.
Корным тӧрлымо йодышым кажне кечын тергат. Марий Эл вуйлатыше Александр Евстифеев «Лӱдыкшыдымӧ да сай качестван автомашина корно» национальный проектын «Регионысо да верысе корно сеть» проектшылан пӧлеклалтше совещанийым эртарен. 2019 ийыште план дечын 22 километрлан, а 2020 ийыште 30 километран шукырак корным тӧрленыт. Кодшо ийын республикыште 170 километр корным шотышко кондымо. Тений пашам шукташ 18 контрактым пеҥгыдемдыме. Нунын дене келшышын 187 километр корным тӧрлат. Субсидий-влакым палемдыме дечын 50 миллион теҥгелан утларак ойырат, тиде окса дене рӱдӧ олаште ешарен, 6 уремым тӧрлат. Совещанийыште регион вуйлатыше корным чоҥаш материалым мемнан регионышто ышташ кӱлмӧ нерген, тыгак 2022-2023 ийлаште кӱ карьер-влакын паша объемыштым кугемдыме нерген ойлен. Тений Йошкар-Ола оласе агломерацийышке пурышо 7 уремым капитально тӧрлат. Совещенийым регион вуйлатыше шке кӱкштымашыже дене мучашлен: 9 май марте район вуйлтыше, олам вуйлтыше-влак муниципал образований чекыште стеле-влакым шотышко кондышаш улыт.
Республикысе чодыралаште 7 тӱжем утла шордо ила. Пӱртӱс ресурс министерстве телымсе маршрутым иктешлен. Сонарлыме кумдыкышто да посна аралыме верлаште 900 утла маршрут дене чылаже 9 тӱжем утла километрым эртеныт. Тидын жапыште специалист да сонарзе-влак кайыкым да янлыкым шотленыт. Эксперт-влак палемдат: кодшо ий дене таҥастарымаште, шерге коваштан янлык чот шагалемын, но тыште лум шуко улмылан кӧра, янлык-влак чодыра дене шагал коштыныт. Чодыралаште 7 тӱжем утла шордо, 50 тӱжем утла кӱдыр, 2 тӱжем утла рывыж, 11 тӱжем утла ош мераҥ, 27 тӱжем утла музо илат.
