Самара гыч турист-влак Йошкар-Олашке толыт. Икымше туристический поезд рӱдӧ олашке 342 унам конда. Нуно Йошкар-Ола, марий калыкын тӱвыра да йӱлаже дене палыме лийыт. Самарыште илыше-влак рӱдӧ олашке «Яркие выходные в Приволжье» проект кышкарыште толыт. Турист-влак кече мучко рӱдо олаште уна лийыт, Шкетан театрыште, тӱссымыктыш галерейышке пурен ончалыт, тыгак Чарла Кремльыште эртыше ярмингашке ушнат. Туштак нунылан кумда фольклор программе темлалтеш. 

Ий йымаке каеныт. Марий Элыште тений икымше тыгай туткар лийын. Юл эҥерыште кум пӧръеҥ Килемар районышто вӱд йымаке каяш тӱҥалыныт. Нунынлан Козьмодемьянск аварийно-утарыше службын специалистышт полшаш толын шуыныт. Утарыше-влак шижтарат: кызыт ий ӱмбаке лекташ лӱдыкшӧ. Мэрийыште палдарат: ий ӱмбаке лекташ чарыме пале-влак уло верыште ий ӱмбаке лекше-влакым шижтарен але административный штрафым пуэн кертыт. 

Тений Козьмодемьянскыште корным тӧрлаш 17 миллион теҥгем ойырат. Тиде окса гыч утларак шийвундо  Гагарин уремыште автостанций гыч «Зодиак» кевыт марте ужашым тӧрлаш кая. 5 миллион утларак теҥгем тиде уремыштак Промышленный гыч автостанций марте тӧрлаш колтат. Козьмодемьянскыште план дене Мичурин, Матросов, Молодежный урем-влакым тӧрлышаш улыт. 

Ялозанлык пашаеҥ-влак шошо агалан ямдылалтыт, тидын дене пырля вольыкын телым вӱташте илен эртарымыжым иктешлат. Марий кундемыште шӧр луштыш пытартыш жапыште шукемын, южо озанлыклаште совет жап дечын ончысо дечынат шуко шӧрым шупшылыт. Ялозанлык министерствыште шӧр лӱштыш да урлыкан вольыкым шукемдыме шотышто каҥашеныт. Тушто тыгак селекций паша да ушкал-влакын генетике потенциалышт шотышто вӱдышӧ специалист-влак мастарлык классым эртареныт. Тачысе кечын озанлык-влак вольыкым, ушкал-влакым ончымылан кугу тӱткышым ойырат.

Йошкар-Олаште подрядчик Эшкинин уремыште шке кӱшешыже лаке-влакым петыркала. Мэрийыште палдарат: тиде паша уремым тичмаш тӧрлаш тӱҥалмешке ышталтеш. Эшкинин уремыште Ленинский проспект гыч Чавайн бульвар марте подрядный организаций 15 апрель гыч пашам  тӱҥалеш. Корным чоҥышо-влак асфальтым вашталтат, бордюр кӱйым, у корно пале-влакым вераҥдат, корнышто разметкым ыштат. Ты уремыште  584 метр корным тӧрлышаш улыт. Тиде пашам «Лӱдыкшыдымӧ да сай качестван автомашина корно» национальный проект дене келшышын шуктат. 

Йошкар-Оласе тӱвыра полатыште коронавирус дечын прививкым шындат. Тиде - Сеҥымашын кумлымшо идалыкше лӱмеш тӱвыра полатыште да Ленин лӱмеш тӱвыра полатыште. Прививкым яра шындаш пелен СНИЛС, полис, паспорт лийшаш. Ленин лӱмеш тӱвыра полатыште прививкым ыштыше пункт кушкыжмо гыч кугарня марте 10 гыч 17 шагат марте пашам ышта, каныш кечылаште 11 гыч 17 шагат марте, Сеҥымашын кумлымшо идалыкше лӱмеш тӱвыра полатыште паша кечын 10 гыч 15 шагат марте. Марий Элышке чылаже 36 тӱжем дозо вакцине толын, республикыште 24 тӱжем утла еҥ прививкым шындыктен, 18 тӱжем вакцинацийын тичмаш курсшым эртен. 

Йошкар-Оласе школлаште икымше классышке кайыше-влакын ача-авашт дечын йодмшым налыт. Тений приемный кампаний 1 апрель гыч эрта. Оласе туныктыш виктемын специалистше-влак мыняр йодмашым пуэныт,  иктешленыт, 5 кече жапыште ача-ава дечын рӱдӧ олаште 3 тӱжем утла йодмаш пурен. Эн ончыч прописке почеш, тыгак кугырак ака але иза-влак тиде школышто тунемыт гын, заявленийым пуаш лиеш. Оласе администрацийыште палдарат: пеҥгыдемдыме огыл кумдык дене школышко каяш шонышо-влак дечын йодмашым 6 июль гыч налаш тӱҥалыт. Школышко каяш йодмашым тыгак Марий Эл туныктыш услугым темлыше портал гоч пуаш лиеш.

Марий Элыште тений кок тылзыште 900 йоча шочын. Маристат палдара: регионышто икшыве-влак шочмаш колышо дечын шагалрак лийын. Статистике дене келшышын, эн шуко ӱдыр-рвезе Йошкар-Ола, Волжск, Козьмодемьянскыште ош тӱням ужыныт. Район-влак коклаште Медведево район ончылно, тыгак Звенигово да Морко районлаште моло дечын шуко икшыве шочыныт. 

Кодшо ий дене таҥастараш гын, республикыште мужыраҥше-влакын чотышт шукемын, а теве мо куандара,  ойырлышо-влак шагалемыныт. 

Марий Эл вуйлатыше Александр Евстифеев Йошкар-Оласе 19-ше номеран школышто пищеблокын пашаж дене палыме лийын. Тачысе кечын рӱдӧ олаште тиде ик эн кугу школ, тушто 1400 утла икшыве тунемеш. Тиде школышто тунеммаш кок смене дене кая. Тынар тӱшка йочам пукшаш чылажымат келыштарыме. Тачысе кечын школышто кочкышлан тӱрлӧ могырымат тӱткыш ойыралтеш: тиде туныктыш министерстве, ача-ава, республикысе кучем, школ вуйлатыше-влак. Йоча-влак пайдале, стандартлан келшыше кочкышым кочыт. Тидымак регион вуйлатыше школышто лиймыже годым палемден. 

Шанче да технологий идалык жапыште Андрей Сахаровын лӱмгечыжлан пӧлеклалтше ончер Т.Евсеев лӱмеш тоштерыште почылтын. Шанчызын илышышыже да пашаже-влакым 18 баннерыште вераҥденыт. Нуным Сахоровский рӱдер пуэн. Тиде шанчызын лӱмжӧ уло тӱнялан палыме.   Андрей Дмитриевич –шанчызе, тудо мландыште ядерный испытанийым эртараш тореш улмыжым ончыктен. «Ядерный сарым сеҥаш огеш лий», манын  тудо.