Марий Эл Радио «Яшь йөрәкләр» - «Шӱм муро» конкурсын регионысо этапшым эртарен. Мурым возышо, йоҥгалтарыше-влак тиде конкурсышко ушненыт. Ятыр мурызо шке пашажым колтен. Озаҥ оласе эксперт-влак паша-влакым палемденыт: Голландий гыч Валентина Васинкина, Италий гыч Елена Нестеренко, Оршанка район гыч «Какшан сем» да Марий Турек район гыч Валерий Шамов. Нунын мурылаштым регион-влак кокласе этапыште Озаҥыште аклаш тӱҥалыт.
Чодыра озанлыкыште тыршыше-влак колым кученыт. Пӱртӱс ресурс министерстве палдара: таҥасымаш Юл эҥерыште эртен, тушко 23 команде ушнен, нунын радамыште вуйлатыше да ведомствын специалистыше-влак. Таҥасымашым эртарымеке, икымше верышке Килемар чодыра озанлык пашаеҥ-влак, кокымшо верышке Морко район, кумшо верышке Волжский лесничествын пашаеҥышт лектыныт.
Республикыште - футбол спортын базовый видшылан шотлалтеш. Тыге организаций-влакын материально-технический базыштым вияҥдаш утларак йӧн ышталтеш. «Арена Марий Эл» куштылго атлетик манежыште республикын сборныйже да «Звезды России» команде коклаште келшымаш матч лийын. Пытартышышкыже Российын сулло спорт мастерже, СССР спорт мастер, тӱнямбал классан спорт мастер-влак ушненыт. Нунын радамыште палыме лӱмлӧ еҥ-влакым ойлаш лиеш: Валерий Шмаров, Юрий Татаркин, Олег Денисов да молат. Таҥасымашыште регион вуйлатыше Александр Евстифеев лийын. Лӱмлӧ спортсмен-влак йоча-влаклан мастар-классым эртареныт.
Регион вуйлатыше палемден: физический культур да спорт айдемын илышыштыже ик эн тӱҥ верым налеш. Марий Эл – спорт дене кылым кучышо регион. Кодшо ийын «Приволжский» послекышто физкультур-спорт комплексым чоҥеныт, спорт школ-влакым оборудований дене пойдарат. Тений Козьмодемьянскыште футбол пасум да Юрино поселкышто стадионым ыштат.
Идалык тӱҥалтыш гыч республикыште 49 йоча ӱмбак пий кержалтын. Кундемыштына кок тылзе жапыште 246 еҥым пий пурлын. Тиде данный дене Роспотребнадзорын регионысо виктемже палдара. 2020 ий дене таҥастарымаште пий пурлмаш 5% шагалемын. Январь-февраль тылзыште республикыште орымаш дене черланыше пий да пырыс-влак вашлиялтын огытыл.
Козьмодемьянскыште Космонавт-влак бульварыште аллейым тӱзатат. Пашам «Оласе йӧнан средам ыштымаш» проект дене келшышын шуктат. Проектын акше – 10 миллион теҥге. Аллей у тӱсым тений налеш, тудо кодшо ийын почмо «Сияние» техноскверым шуя. Тушто улшо корнышко асфальтым шарат, теҥгыл да урно-влакым келыштарат, тыгак понар да 15 видеоэскерымаш камерым вераҥдат. Ленинын памятникын постаментшым керамогранит плита дене оптат, тыгак тошкалтышым шотышко кондат, да мэрийын оралте воктеныже пеледыш клумбо-влакым ыштат. Администрацийыште палдарат: пашаеҥ-влак кодшо кечылаште пушеҥге-влакым шотышко кондаш тӱҥалыныт.
Регионысо 18 добровольческий проект Марий Эл вуйлатышын грантшым сеҥен. Поро пашам ыштыме шотышто практике, тыгак корпоративный волонтерствылан полыш ойыралтеш. Сеҥыше-влак радамыште тунемме тӧнеж, волонтер организаций, библиотеке да поро кумылым ончыктышо фонд-влак улыт. Нунын дене самырык-влакын политике, спорт да туризм министерствыште палыме лияш йӧн уло. Конкурс «Образований» национальыный проектын «»Социальная активность» регионысо проект дене келшышын эртен.
Йошкар-Оласе уремлаште лакылам литой асфальт дене петыркалат. Каныш кечылаште рӱдӧ олаште 12 тонн вартышым оптеныт. Мэрийыште палдарат: Свердлов, Зарубин, Строитель уремлаште, Кокшайский тракт да Сеҥымаш бульварыште пашам шуктеныт. Йошкар-Ола уремлаште лакылам йӱдым петыркалат. Администрацийыште шижтарат: тиде жаплан веле. Игече шокшо лиймеке, корным тӱрыс тӧрлаш тӱҥалыт. Ушештарена, тений Марий Элыште 200 километр корным тӧрлышаш улыт. Федерал бюджет гыч республикылан 969 миллион теҥгем ойырат.
Марий Элыште «Формирование комфортной городской среды» лӱман национальный проект умбакыже илышыш пурталтеш. Тений тудо вес йыжыҥыш кусна. Еҥ-влаклан тӱзатышаш объектым ойыраш йӧнан лийже манын, лӱмынак платформым келыштарат. Тушко «Госуслуги» портал полшымо дене регистрироватлалташ лиеш. Рӱдолаште илыше-влак 2022 ийыште оласе кӱмдыкым тузатыме шотышто шке шонымашыштым темлен кертыныт. Спискыш 37 тӱшкан пайдаланыме кумдык пурталтын. Нунын кокла гыч 19-жым пенгыдемденыт да планыш пуртеныт.
Александр Евстифеев регионысо правительстве еҥ-влак дене икмыняр йодышым каҥашен. Тачысе кечын чыла гаяк отрасль-влакын мыняр-гынат вияҥмыштым палемдаш лиеш. Ялозанлык сферыште паша кая, 2020 ийым иктешлен ончалаш гын, ялозанлык продукцийым лукмо производство кугыт 50 миллиард теҥгешке шуын, тидыже 2019 ий дене таҥастарымаште 4% шукырак. Кугу пашам чоҥымаш отрасль шуктен. Экономике да соцаил сферым вияҥдаш инвестиций-влак кодшо ийын 37 миллиард теҥгешке шуыныт.
Владимир Путин Федеральный Собранийлан шке ойжым вӱргечын 21 апрельыште ойла. Тидын нерген президентын пресс-секретарьже Дмитрий Песков увертарен. Мероприятийым эртарыме верым, варарак палдарат. Посланийын темыже-влакым огыт ойло, тиде йӱлашке пурен, но политик да эксперт-влак палемдат: элын вуйлатышыже пашам ыштыше пенсионер-влакын пенсийын индексацийже, коронавиурс дечын вакцинацийым ыштыме, Кугыжаныш Думышко йӱклымаш, экономикым пеҥгыдемдымаш, бизнеслан да профессионал спортлан полшымо нерген ойлаш тӱҥалеш.
