Марий Эл Радио

Йошкар-Олаште ешартыш шинчымаш виктыш шотышто навигатор уло

  • Дата: 14:14, 24-03-2021
  • Просмотров: 334

Йошкар-Олаште ешартыш шинчымаш виктыш шотышто навигатор уло. Рӱдӧ олаште «Кажне йочан сеҥымашыже» федерал проект илышышке шыҥдаралтеш. Оласе туныктыш учрежденийлаште 4 виктыш дене ешартыш верым ыштеныт: художественный, технический, физкультур-спорт, социал-педагогике. Ача-ава-влак йочалан келшыше кружокым сайтыште шке ойырен кертыт. Платформышто личный кабинетым ыштыман да илымверым ойырыман. Сайтын адресше: р12.навигатор.дети


Марий Эл Радио

Полышым пуаш шонымаш дене шотлат

  • Дата: 14:10, 24-03-2021
  • Просмотров: 373

Марий Элыште изирак бизнесын экономический переписьше эрта. Тудын тӱҥ шонымашыже – регионышто изирак да кокла бизнес дене кылдалтше тичмаш уверым чумыраш. Тыге предпринимательствым вияҥдыме шотышто иктешлымашым ышташ лиеш. Переписьым эртарымеке, субсидийым да пашам вияҥдаш адресно полышым ойыраш тӱҥалыт. Бизнесым 5 ийлан ик гана шотлат, тушто изирак да кокла бизнес, кодшо идалык мучашлан кугыжаныш реестрыште шотлалтше индивидуальный предприниматель-влакын данныйыштым ончат.  Адвокат, нотариус, тыгак гараж-чоҥышо, илымвер да кредит шотышто потребительский кооператив-влак переписьыш огыт лолгал.  План дене 7 тӱжем утларак изирак предприятий, да 12 тӱжем утла индивидуальный предпринаметль-влакым шотлат. Шке паша нерген отчетым амалкалче-влак Маристатышке 1 апрель марте колтышаш улыт. 


Марий Эл Радио

Республикыште 20 тӱжем утла еҥ коронавирус дечын прививкым шындыктен

  • Дата: 14:08, 24-03-2021
  • Просмотров: 442

Республикыште 20 тӱжем утла еҥ коронавирус дечын прививкым шындыктен. Тидын нерген Правительствын заседанийыштыже тазалыкаралтыш министр Марина Панькова палдарен. Тачысе кечын вакцинацийышке 18 ий дечын кугырак кажне кумылан возалтын кертеш. Прививкышке шокшо линий,  «Госуслуги» портал, тыгак поликлиникыште возалташ йӧн уло. Шуко функциян рӱдерлаштат специалист-влак еҥ-влаклан прививкышке возалташ полшен кертыт. Марий Элыште прививке дечын вара осложнений нигӧнат вашлиялтын огыл. Вакцинацийым эртыше-влак гыч 48 процентше 60 ияш дечын кугырак улыт. Республикышке тылзе мучаш марте эше 10 тӱжем утла дозо вакцине толшаш. Кундемыште 19 медицин организацийыште прививкым шындат, вакциным аралаш холодильный оборудованийым республике ситышын налын, медицин организацийлаште чылаже 110 пункт уло, куснылшо 52 бригаде пашам ышта. 


Марий Эл Радио

Шошымвӱд ташлыме жаплан республике ямде

  • Дата: 14:03, 24-03-2021
  • Просмотров: 412

Шошымвӱд ташлыме жаплан республике ямде. Тидым, тыгак кундемын социал-экономике могырым вияҥмашыже нерген регионысо Правительствын заседанийыштыже каҥашеныт. Тудым Александр Евстифеев эртарен. Тений кундемыште 21 объектым чоҥен шуктышаш улыт, нунын гыч 11-же дене чоҥымо пашам шукташ контрактым пеҥгыдемдыме. Правительстве заседанийыште бюджетым кучылтмо нергенат ойленыт. Кодшо ийын мутлан, 9 миллиард наре теҥгем национальный проект-влакым илышышке пурташ колтеныт, тышечын утларак оксаже корным чоҥаш, 1 миллиард утларак «Демографий» национальный проектлан ойыралтын. Идалык тӱҥалтышлан республикын кугыжаныш парымже 11 миллиард теҥгешке шуын. 


Марий Эл Радио

Марий Турекыште В.Мосолов лӱмеш краеведений тоштерыште Марий Элын калык артисткыже Светлана Сушкина дене вашлиймаш лийын

  • Дата: 16:04, 17-03-2021
  • Просмотров: 398

Марий Турекыште В.Мосолов лӱмеш краеведений тоштерыште Марий Элын калык артисткыже Светлана Сушкина дене вашлиймаш лийын. Тений январьыште Светлана Сергеевналан 75 ий темын. Марий Турек район Кукрем ялын шочшыжо шке жапыштыже И.Палатнай лӱмеш музыкальный училищым, Озаҥ оласе консерваторийым тунемын пытарен, ятыр жап Эрик Сапаев лӱмеш опер да балет театрын солисткыже семын чапланен. Светлана Сергеевнам ятыр уна саламлен, тыгак Арбор тӱвыра пӧрт пеленсе «Арбор вел» да  Марий Турек сымыктыш школын туныктышыжо-влакын «Кантилена» ансмабльже муро-влакым йоҥгалтареныт. 


Марий Эл Радио

Тӱвыра да сымыктыш аланлан специалистым ямдылыше апшаткудо

  • Дата: 16:03, 17-03-2021
  • Просмотров: 501

И. Палантай лӱмеш колледжын выпускникше-влак тӱня мучко палыме улыт. Ятыр мурызо, семмастар, семӱзгар дене шоктышо, районласе тӱвыра пӧртын пашаеҥышт лачак ты тӧнежым тунем пытареныт. Таче колледжыште кок факультет, тӱвыра да театр сымыктыш ден академический музык факультет-влак улыт. Тыште студент-влакым 12 направлений дене туныктат. Тыгак колледж пелен йоча сымыктыш школ, фольклор лабораторий, балет школ пашам ыштат. Колледжын усталык коллективше-влакат ты туныктымо тӧнежын кугешнымашыже улыт. Таче тыште 400 утла студент тунемеш. Шке илышым тӱвыра алан дене кылдаш шонышо кажне еҥ нунын радамышке ушнен кертеш. Приемный кампаний моло туныктымо тонеж семынак кенежым тӱҥалеш. Кумдарак уверым колледжын сайтыштыже вераҥдыме. 


Марий Эл Радио

Марий Элын командыже спортивный туризм дене Россий Первенствыште ончыко лектын

  • Дата: 15:44, 17-03-2021
  • Просмотров: 553

Марий Элын командыже спортивный туризм дене Россий Первенствыште ончыко лектын. Кодшо кечылаште Корта ече-базыште таҥасымаш эртен. Тушко Российын 20 утла субъектла гыч спортсмен-влак ушненыт. Тидын радамыште Свердловский область, Ханты-Манийский автономный округ, Челябинский область, Вологодский область, Красноярский край, Коми республике гыч. Марий кундем гыч спортсмен-влак команде дене ончылно лийыныт. Тиде кечылаште гын, мемнан республикыште ече дистанцийын  спорт туризм дене тӱнямбал кӱкшытан таҥасымаш эрта


Марий Эл Радио

Медведево муниципал район федерал стандарт дене келшышын, спорт ямдылалмтмашым шуктышо-влаклан субсидийым сеҥен

  • Дата: 15:43, 17-03-2021
  • Просмотров: 351

Медведево муниципал район федерал стандарт дене келшышын, спорт ямдылалмтмашым шуктышо-влаклан субсидийым сеҥен. Тудым республикысе бюджет гыч ойырат да Медведево спорт школым вияҥдаш колтат. Тыгай субсидийым район кумшо гана налеш. Вес ийынат тыгай полышым  район-влаклан пуаш тӱҥалыт. 


Марий Эл Радио

Марий Элыште ФСБ виктем наркотикым кондымо каналым петырен

  • Дата: 15:41, 17-03-2021
  • Просмотров: 321

Марий Элыште ФСБ виктем наркотикым кондымо каналым петырен. Сотрудник-влак Московский областьыште илыше еҥым кученыт. Тудо наркотический средствым шупшыктымо регион-влак кокласе корным ыштен. Палдарат: титаклыме еҥ Интернет-кевытын курьерже лийын, Йошкар-Олашке 2 килограмм наре аяр веществам конден, осал пашам шуктышым наркотикым ужалыме годым кученыт. Марий Элыште Россий ФСБ виктемын следственный отделенийже тидын шотышто уголовный пашам тарватен. Тидын нерген ФСБ виктемын пресс-службыжо увертара. 


Марий Эл Радио

Марий Элыште тений тулык йоча-влаклан утларак пачерым пуат

  • Дата: 15:39, 17-03-2021
  • Просмотров: 365

Марий Элыште тений тулык йоча-влаклан утларак пачерым пуат. Тиде йодыш шукталтмым регион вуйлатыше Александр Евстифеев тӱткыштыштӧ куча. Тений Йошкар-Олаште Петров уремыште у пӧртыштӧ тулык йоча-влаклан пачерым пуэныт. Тушко вигак илаш пураш лиеш, кӧргӧ отделкым ыштыме, обойым пижыктыме, газ плита уло, санузелым келыштарыме. Тиде пӧрт воктенак у йочасад, кевыт уло. Тений Йошкар-Олаште тыгак эше 120 пачеран у пӧртым чоҥаш тӱҥалыт. Тудым нӧлташ муниципал контрактым пеҥгыдемдыме.