Шернур район Марисолаште спортплощадкым чоҥат. Тидын шотышто информацийым Кугыжаныш закупко сайтыште савыктеныт. Федерал, регионысо да верысе бюджела гыч ик миллион утларак теҥгем ойырат. Спортплощадкым Марисолаште Микрорайон урем 4-ше номеран пӧрт ваштареш ыштат. Тушто баскетбол дене модаш оҥго, гандбол капка лийыт, площадкым волгалтарат. Пашам шыже марте мучашлышаш улыт. 

Марий Эл сборный гыч спортсмен-влак ече дистанцийыште спорт туризм дене элын чемпионатыште сеҥыше да призер радамышке лектыныт. Свердловский область Березовский олаште кодшо кечылаште таҥасымаш эртен. Команде дене республикын сборныйже кокымшо лийын. Чылаже Россий чемпионатышке 12 регион гыч комнаде-влак ушненыт. Посна видыште республике гыч Ксения Мубарашкина ден Екатерина Николаева ойыртемалтыныт. 

Марий Элыште илыше 7 еҥ лже-банкир-влаклан кум миллион наре теҥгем колтен. Регионысо МВД палдара: эн шуко оксалан 64 ияш Йошкар-Олаште илыше ӱдырамаш ондалалтын. Тудым мошенник-влак палыме йӧн почеш ондаленыт. Ӱдырамашым тудын пуйто счетла гыч оксажым шолышташ шонат, манын ондаленыт. Тиде амаллан кӧра ӱдырамаш кок кечыште 22 тӱрлӧ телефон номерышке 74 гана, чылаже ик миллион наре теҥгем колтен. Тыгаяк йӧн дене Советский район гыч 68 ияш ӱдырамаш ондалалтын. Медведево районышто 39 ияш ӱдырамаш палыдыме еҥ-влаклан 636 тӱжем теҥгем колтен. Рӱдо олаште илыше 66 ияш пӧръеҥ 400 утла тӱжем теҥгем йомдарен. Тачысе кечын нине йодмаш-влак дене тергымашым эртарат, южо случай шотышто уголовный пашам тарватеныт. 

Марий Элыште туризм областьыште республике вуйлатышын грантшылан конкурсым увертареныт. Йодмашым регионысо спорт да туризм министерствыште вучат. Сеҥыше-влакым икмыняр номианций дене ойыраш тӱҥалыт: тиде республикыште туристический объектын модернизацийже, тыгак муниципал образованийыште кумдыкым шотышко кондымаш да туриндустицийын субъектшым вияҥдыме шотышто. Чумыржо грант-влаклан тений 800 тӱжем теҥгем ойырат. Йодмашым 17 март гыч 27 апрель марте: Йошкар-Ола, Успенский урем, 38 адрес дене налыт.  

Йоча-влак у оборудований дене шинчымашыштым келгемдат. «Кажне йочан сеҥымашыже» проект дене йоча да самырык-влаклан технический усталык рӱдерыште у класс-влакым ыштеныт. Тиде «моделирований» да «киностудий».   Тачысе кечын у оборудований полшымо дене 100 утла ӱдыр-рвезе шуаралтеш. Йоча-влак секцийыште тӱрлӧ модель-влакым ыштат, тыгак фото- видеооборудований дене тунемыт. Ӱдыр-рвезе-влак социал кӱлешан тӱрло ролик-влакым войзат да конкурслашке ушнат. 

Нижний Новгород олаште «Учитель будущего. Студенты» профессионал конкурсын округысо полуфиналже тӱҥалын. Тушко Марий Эл гыч кок студент эртен. Организатор-влак палемдат: нуно дистанционный тестированийыште сай шинчымашым ончыктеныт. Юл кундемысе федерал округысо этапышке 100 утла студент ушнен, нунын гыч коктынжо Марий Эл гыч. Конкурс кум кече шуйна. Сеҥыше-влак «Артек», «Океан», «Орленок», «Смена» российысе йоча рӱдерлаште, але «Сириус» тунемме рӱдерыште стажировкым эртен кертыт. 

Шошо шке вийжым налаш огеш вашке. Луман игечым йӱштӧ алмашта. Тидыже коммунал службын пашажам нелемда. Лумым корнылаште веле огыл, тыгак кудывечылаштат луктыт. Кугорныла гыч лумым «Ола» муниципал предприятий йӱдым луктеш, кудывече-влакым эрыктымылан пӧртвиктарыше компаний-влак вуйын шогат, но ола администраций тиде паша шукталтмымат тӱткын терга. Тений национальный проект дене рӱдо олаште 9 уремым тӧрлаш тӱҥалыт: нунын радамыште Советский, Лебедев, Эшкинин да молат. Тушто лумым 10 апрель марте эрыктен шуктышаш улыт. 

Йошкар-Олаште Эшкинин уремыште йолешке-влакын коштмо верыштым тӱзатыме шотышто аукционым увертареныт. Рейтинг йӱклымаште еҥ-влак Ленинский проспект гыч Чавайн бульвар марте корно ужашым тӧрлаш шкештак ойыреныт. Пашам 15 апрельыште тӱҥалшаш да августышто мучашлышаш улыт. Ушештарена, вес ийын «Оласе йӧнан средам ыштымаш» проект дене могай кумдыкым тӱзатат, еҥ-влак российысе платформышто шкешт ойырышаш улыт. Йӱклымаште 19 адресым луктыт, 26 апрель гыч 30 май марте ойырен кертыт. Мэрийыште олаште илыше-влаклан йӱклымаш шотышто умылтарыме пашам шукташ волонтер-влакым вучат. Кумылан-влак 22 марте марте dobro.ru сайтышке йодмашым колтышаш улыт. 

Республикыште тений онкологий полыш шотышто кум рӱдерым почшаш улыт. Тиде Волжск, Шернур, Козьмодемьянскыште. Тидын нерген регионысо тазалыкаралтыш министерстве увертара. Тушто онкологий дене черле-влаклан кумда полышым пуаш тӱҥалыт: тиде черын диагностикыже, специалист-влак дене консультаций, паллиативный полыш да молат. Волжск рӱдо эмлымвер пелен онкополыш рӱдерым апрельыште, Козьмодемьянскыште июньышто, Шернур рӱдӧ эмлымвер пелен сентябрьыште почшаш улыт. 

Ковид дене черле-влаклан амбулаторный рӱдер-влак почылтыныт. Тушто Ковид лийын кертме лудыкшӧ але тиде чер дене еҥ-влаклан эмлымвер йӧным ойырат. Рӱдер-влакым Волжск, Шернур  рӱдӧ эмлымверлаште, Козьмодемьянскыште межрайонный больницыште, Йошкар-Оласе 1, 2, 3, 4 номеран поликлиникылаште, тыгак 1-ше номеран медсанчасть да сарын ветеранже-влакым эмлыше клинический госпитальыште ыштеныт. Тушко пациент-влак врач але участковый терапевтын направленийже дене логалаш лиеш.