Федерал проектла дене яллаштат кундем-влакым тӱзатат
16:32, 29-06-2021. Разместил: zhannk
Марий Турек поселкышто «Оласе йӧнан средам ыштымаш» проект дене келшышын, кудывече, тӱшка вер, тыгак корно-влакым шотышко кондат. Тыге, мутлан, Красноармейский уремыште ты марте корно начар лийын, йӱр дечын вара вӱд погынен, кастене пычкемыш лийын. Чыла тидым шотышко налын, 27 номеран пӧртыштӧ илыше-влак кундемым тӱзаташ йодмаш дене лектыныт. Тушто пӧрт деке пурымо корным ыштеныт, теҥгыл-влакым, урным келыштареныт.
Комсомольский уремыштат паша кая. Тушто аптека да школ воктен эртыше тротуарым тӧрлат. План дене пашам кок арня гыч мучашлат. Оласе йӧнан средам ыштымаш проект дене рӱдӧ урем-влакымат тӧрлат. Администрацийыште палемдат: тений Лесной, Больничный, Комсомольский уремлаште корным чоҥат. Тидлан 7 миллион утларак теҥге ойыралтын. Планыште школ маршрут дене корным шотышко кондымаш.
Вернуться назад