Марий Элыште «Земский доктор» да «Земский фельдшер» программе дене келшышын 26 врач да 9 фельдшер тора яллашке пашашке каят

Марий Элыште «Земский доктор» да «Земский фельдшер» программе дене келшышын 26 врач да 9 фельдшер тора яллашке пашашке каят. Районлаштат тиде программе дене пашам ыштыше-влак улыт. Тыге, мутлан, Звенигово районысо Шимшурга ялышке кок ий ончыч самырык специалист толын. Пандемий жапыште прививкым шындымаште тырша, еҥ-влаклан полша. Кодшо ийын республикыште специалист-влак Оршанка, Шернур, Медведево районлашке пашашке каеныт, а 2012 ий гыч чылаже 160 специалист яллашке пашам ышташ каен. Кок ий ончыч программышке вашталтышым пуртеныт. Целевой направлений ден вузым пытарыше самырык специалист-влак «Земский доктор» семын яллашке каен кертыт. Тыгодым медицин учрежденийште кадр чӱдылык лийшаш. Тений Шернур, Волжский, Звенигово, Советский районлаште медпашаеҥ-влакым вучат.