Республикыште посна категорий граждан-влак иммунизацийым чылан эртышаш улыт

Республикыште посна категорий граждан-влак иммунизацийым чылан эртышаш улыт. Коронавирус дене черланыше-влакын шукеммыштлан кӧра, регионын тӱҥ санитар врачше Светлана Булатова постановленийышке кидпалыжым пыштен.   Тудын дене келшышын, ужалымаш, косметике да парикмахер услугым темлыше, МФЦ да клиентский службо, кочмо верлаште, фитнес да спорт, транспорт, образований, тӱвыра да каныме, тазалыкаралтыш, социал вияҥмаш сферыште, тыгак кугыжаныш да муниципал службышто ыштыше,   кӱшыл тунемме верын студентше, армийышке кайыше-влак чылан иммунизацийышке ушнышаш улыт. 1 сентябрь марте икымше компонент дене прививкым шындыман, а 25 сентябрь марте организацийыште пашам ыштыше-влак гыч 60 процентше кокымшо компонент дене   иммунизацийым эртышаш. Постановлений 22 июль гыч вийым налын. Ешарен кодена, регион вуйлатыше Александр Евстифеев указышке ешартышым пуртен. Тудын дене келшышын, палемдыме жапыште прививкым ыштыдыме еҥ-влакым пашадарым аралыме дечын посна паша гыч кораҥдат.